Մարկ Ցուկերբերգը մասնավոր դպրոց է բացել իր դուստրերի համար և այն անվանել է իր հավի անունով

Դպրոցը կոչվել է Bicken Ben School։

Meta-ի հիմնադիր Մարկ Ցուկերբերգը փաստացի «ավերել» է Պալո Ալտոյում իր հանգիստ թաղամասը, որպեսզի իր դուստրերի և նրանց ընկերների ուշադիր ընտրված շրջանակի համար անլեգալ մասնավոր դպրոց կառուցի, հաղորդում է Wired-ը։

Հեգնանքն այն է, որ դպրոցը կոչվել է Bicken Ben School՝ Ցուկերբերգ ընտանիքի հավիկներից մեկի անունով։ Ըստ The New York Times-ի, դպրոցը Կալիֆոռնիայի կրթության դեպարտամենտի պաշտոնական գրանցամատյանում հայտնվել է միայն 2022 թվականի հոկտեմբերին, չնայած հարևանները պնդում են, որ երեխաները սկսել են ավելի վաղ հաճախել։ Դպրոցը պաշտոնապես սկսել է աշխատել ինը աշակերտով, բայց մինչև 2025 թվականը այդ թիվը հասել է 30-40-ի։

Ավելին, դպրոցի կայքում աշխատանքի հայտարարությունում նշվում էր միջնակարգ դպրոց բացելու ծրագրերի մասին։ Բնակելի թաղամասում մասնավոր դպրոց բացելու համար անհրաժեշտ է քաղաքային իշխանությունների հատուկ թույլտվությունը, սակայն, ըստ Wired-ի, Ցուկերբերգը այն չի ստացել։

Թաղամասի բնակիչները բողոքել են աղմուկից, քանդումից և անընդհատ շինարարությունից, իսկ պաշտոնյաները, որոնք փորձել են հետաքննել այս հարցը, ըստ տեղեկությունների, ճնշման են ենթարկվել միլիարդատիրոջ թիմի կողմից։

Ակնհայտ խախտումներից անկախ, դպրոցը շարունակել է աճել, և, ինչպես նշում է Wired-ը, Մարկ Ցուկերբերգն ինքը, ըստ երևույթին, ոչ մի տարօրինակ բան չի տեսնում հարևաններին զայրացնելու և տեղական օրենքները խախտելու մեջ։