Տնտեսվարողները վերացրել են խախտումները, կասեցումները դադարեցվել են. ԲԸՏՄ

Բնապահպանության և ընդերքի տեսչական մարմնի վերահսկողական միջոցառումների արդյունքում մի շարք տնտեսավարողներ վերացրել են արձանագրված խախտումները և ստացել անհրաժեշտ թույլտվությունները։

2025 թվականի նոյեմբերին կասեցվել էր Կոտայքի մարզի Ջրաբերի լիթոիդային պեմզայի հանքավայրում գործող «ԶԵՓՅՈՒՌ-ԵՐԵՔ» ՍՊԸ-ի ջարդիչ–տեսակավորման կայանի շահագործումը՝ մթնոլորտային օդ վնասակար նյութերի արտանետման թույլտվություն չունենալու հիմքով։

2025 թվականի հուլիսին կասեցվել էր Արմավիրի մարզի Վաղարշապատ քաղաքում գործող «Տնկարան» ՍՊԸ-ի գազալցակայանի տարածքում առկա խորքային հորի ապօրինի շահագործումը։ Նույն տարվա դեկտեմբերին կասեցվել էր նաև Էջմիածին քաղաքում բետոնի և պեմզաբլոկների արտադրությամբ զբաղվող «Գևորգ Անդրեասյան» Ա/Ձ-ի բետոնահանգույցի գործունեությունը՝ համապատասխան թույլտվությունների բացակայության պատճառով։

Գեղարքունիքի մարզի Հայրավանք բնակավայրում՝ «Սևան ազգային պարկ» ՊՈԱԿ-ի հատուկ պահպանվող տարածքի վարձակալված հատվածում գործող ավտոլվացման կետում հայտնաբերվել էր ապօրինի ջրառ։ 2025 թվականի օգոստոսին Ա.Մ.-ին պատկանող ավտոլվացման կետում առանց թույլտվության շահագործվող խորքային հորի գործունեությունը ևս կասեցվել էր։

Տեսչական մարմնի հաղորդմամբ՝ բոլոր տնտեսավարողները լիազոր մարմնից արդեն ձեռք են բերել համապատասխան թույլտվություններ, ինչի հիման վրա կայացվել են կասեցումները դադարեցնելու մասին որոշումներ։