Ապրիլի 1-ից կբարձրացվեն ԱՊՊԱ հատուցման առավելագույն սահմանաչափերը. մանրամասներ

Բյուրոյից նշում են, որ գործող ապահովագրական գումարները լիարժեք չեն ծածկել ԱՊՊԱ ոլորտում առաջացող վնասների զգալի մասը

Ապրիլի 1-ից ուժի մեջ կմտնեն Հայաստանի Ավտոապահովագրողների Բյուրոյի խորհրդի 11/12/2025թ․ թիվ 38-Լ որոշմամբ հաստատված և ՀՀ կենտրոնական բանկի կողմից 30/01/2026թ․ գրանցված «ԱՊՊԱ ընդհանուր պայմաններ» RL 1-001 կանոնների փոփոխությունները։

Բյուրոյից տեղեկացնում են, որ կատարված փոփոխություններով բարձրացվել են ապահովագրական գումարները՝ հատուցման առավելագույն սահմանաչափերը։

Մասնավորապես՝

• գույքին պատճառված վնասների համար գործող 1 800 000 ՀՀ դրամի փոխարեն սահմանվել է 2 500 000 ՀՀ դրամ,

• անձնական վնասների համար գործող 3 300 000 ՀՀ դրամի փոխարեն սահմանվել է 3 500 000 ՀՀ դրամ։

Միևնույն ժամանակ, մեկ ապահովագրական պատահարի հետևանքով բոլոր տուժողներին պատճառված վնասների հանրագումարի գծով ապահովագրական գումարները բարձրացվել են համամասնորեն՝

• գույքային վնասների դեպքում՝ մինչև 25 000 000 ՀՀ դրամ,

• անձնական վնասների դեպքում՝ մինչև 35 000 000 ՀՀ դրամ։

Բյուրոյից նշում են, որ գործող ապահովագրական գումարները լիարժեք չեն ծածկել ԱՊՊԱ ոլորտում առաջացող վնասների զգալի մասը, իսկ փոփոխությունները հնարավորություն կտան առավել ամբողջական պաշտպանել տուժողների շահերը։