Մարտի 9-ի բիզնես լուրերը

ՏԵՂԱԿԱՆ ԼՈՒՐԵՐ

Տնտեսական հանցագործություններով պետությանը պատճառված վնասից վերականգնվել է ավելի քան 30 մլրդ դրամ

2025 թվականին տնտեսական գործունեության դեմ ուղղված հանցագործությունների գործերով քրեական վարույթների շրջանակում վերականգնվել է 30 մլրդ 341 մլն դրամի վնաս։ Ավարտված վարույթներով վերականգնվել է 15 մլրդ 463 մլն դրամ։ Դատախազության տվյալներով՝ վերականգնումներ են կատարվել նաև նախկին պաշտոնատար անձանց և պատգամավորների հետ կապված գործերով։

3 օրում բացահայտվել է 268 հանցագործություն

Վերջին երեք օրում իրավապահ մարմինները բացահայտել են 268 հանցագործություն, որոնցից 8-ը՝ նախկինում կատարված։ Գրանցվել է 30 ճանապարհատրանսպորտային պատահար։ Հայտնաբերվել է 24 հետախուզվող, իսկ մեկ անձ կամավոր ներկայացել է իրավապահներին։

Պարզեցվում է մինչև 300 քմ բնակելի տների կառուցման թույլտվության գործընթացը

Հայաստանում նախատեսվում է պարզեցնել մինչև 300 քմ անհատական բնակելի տների կառուցման թույլտվության ստացման կարգը։ Նախագծի պարտադիր փորձաքննությունը կփոխարինվի արտոնագրված ճարտարապետի երաշխավորագրով։ Համակարգը նախատեսվում է ամբողջությամբ գործարկել 2026 թվականի հունիսի 1-ից։

Հայաստան աղտոտված օդի ներթափանցման վտանգ չկա

«Հիդրոօդերևութաբանության և մոնիթորինգի կենտրոն»-ը հայտնել է, որ Իրանից դեպի Հայաստան աղտոտված օդի ներթափանցման վտանգ չկա։ Վերջին օրերի տեղումների ուսումնասիրությունները ցույց են տվել, որ թթվայնության կամ քիմիական կազմի փոփոխություն չի արձանագրվել։

Գործարկվել է սպառողների բողոքների համար թվային հարթակ

Մրցակցության և սպառողների պաշտպանության հանձնաժողովը գործարկել է «Սպառողի օգնական» թվային հարթակը, որի միջոցով քաղաքացիները կարող են ներկայացնել սպառողական իրավունքներին առնչվող բողոքներ։

ՄԻՋԱԶԳԱՅԻՆ ԼՈՒՐԵՐ

Թրամփը նավթի գների աճը անվանել է «չնչին գին» անվտանգության համար

ԱՄՆ նախագահ Դոնալդ Թրամփը հայտարարել է, որ նավթի գների բարձրացումը ժամանակավոր է և այն «չնչին գին» է անվտանգության ապահովման դիմաց։

Դուբայի անշարժ գույքի շուկան ճնշման տակ է

Մերձավոր Արևելքում հակամարտության սրման ֆոնին Դուբայի անշարժ գույքի շուկան հայտնվել է ճնշման տակ։ Ներդրողները դարձել են ավելի զգուշավոր, իսկ գործարքների ակտիվությունը կարող է ժամանակավորապես նվազել։

ԱԶԲ-ն գնահատում է պատերազմի հնարավոր ազդեցությունը Ասիայի տնտեսության վրա

Ասիական զարգացման բանկի գնահատմամբ՝ Մերձավոր Արևելքում հակամարտության տնտեսական հետևանքները Ասիայի համար մեծապես կախված կլինեն դրա տևողությունից։

Եվրոպայում գազի գինը գերազանցել է 800 դոլարը

Մարտի 9-ի սակարկությունների ընթացքում Եվրոպայում գազի գինը առաջին անգամ 2023 թվականի հունվարից հետո գերազանցել է 800 դոլարը 1000 խորանարդ մետրի դիմաց։ Դա պայմանավորված է նավթի գների աճով և տարածաշրջանային լարվածությամբ։