Ժամկետային ծառայության կրճատումը քաղաքական նպատակներ չի հետապնդում․ Պապիկյան

Մեր հանրության արձագանքներն ենք հաշվի առել։

Պաշտպանության նախարար Սուրեն Պապիկյանը համաձայն չէ այն դիտարկման հետ, թե պարտադիր ժամկետային զինծառայության ժամկետի կրճատումը 2026 թվականին ընդառաջ «Քաղաքացիական պայմանագրի» օգտին քվեներ հավաքելու միջոց է։

«Մեր հանրության արձագանքներն ենք հաշվի առել։ Եթե օրենքի փոփոխությունը տեղի ունենար հունիսից, հունվարի 1-ից հետո բանակ գնացողների համար դա անարդար կլիներ։ Հաշվարկները մեզ թույլ էին տալիս դա անել ավելի վաղ և մենք՝ անսալով մեր քաղաքացիների խնդրանքներին... մեզ համար էլ ակնհայտ է դարձել, որ շատ ավելի ճիշտ կլինի, եթե մենք դա անենք հունվարի 1-ից։ Մենք այդ որոշմանը հանգել ենք և վարչապետն այդ մասին հայտնել է»,– ԱԺ–ում լրագրողների հետ ճեպազրույցում ասաց Պաշտպանության նախարար Սուրեն Պապիկյանը։

Լրագրողների հարցերին՝ հունվարի 1-ից սպայական կազմում աշխատավարձի բարձրացում նախատեսվա՞ծ է, նախարարը պատասխանեց.

«Ատեստացիոն համակարգը ներդրված է, այն ընացքի մեջ է, կարծում եմ՝ աշխատավարձի բարձրացման ավելի լավ հնարավորություն չի կարող լինել»։