Բնապահպանական խնդիրներից մինչև տրանսպորտ․ ինչից են դժգոհ երևանցիները

Արձանագրվել են նաև քաղաքացիների կողմից նկատված դրական փոփոխությունները։

Հունվարին անցկացված սոցիոլոգիական հարցման արդյունքները մամուլի ասուլիսում ներկայացրել է Gallup International-ի հայաստանյան ներկայացուցչության ղեկավար Արամ Նավասարդյանը։

Հարցման տվյալներով՝ քաղաքացիների 29.6 տոկոսը որպես հիմնական խնդիր նշել է բնապահպանական հարցերը։ Երկրորդ տեղում են մշտական խցանումները՝ 26.5 տոկոս ցուցանիշով։ Վատ ճանապարհներից դժգոհել է հարցվածների 22.6 տոկոսը, աղբահանությունից՝ 16.3 տոկոսը, իսկ հասարակական տրանսպորտի խնդիրը նշել է 15 տոկոսը։

Տվյալները ցույց են տալիս, որ դժգոհությունների հիմնական մասը վերաբերում է քաղաքային ենթակառուցվածքներին և միջավայրի որակին, որոնք անմիջական ազդեցություն ունեն առօրյա շարժունակության և կենսապայմանների վրա։

Միևնույն ժամանակ հարցման ընթացքում արձանագրվել են նաև քաղաքացիների կողմից նկատված դրական փոփոխությունները։ Հարցվածների 17 տոկոսը որպես դրական քայլ նշել է մայրաքաղաքի տրանսպորտի համար նոր ավտոբուսների ձեռքբերումը։ Ճանապարհների ասֆալտապատումը դրական է գնահատել 12.3 տոկոսը, աղբահանության կազմակերպումը՝ 10.6 տոկոսը, բակերի բարեկարգումը՝ 10.1 տոկոսը։

Դրական փոփոխությունների շարքում նշվել են նաև զբոսայգիների բարեկարգումը (8.7%) և տարածքների կանաչապատումը (7.7%)։ Այս ցուցանիշները վկայում են, որ իրականացվող ծրագրերը նկատվում են քաղաքացիների կողմից, սակայն դրանց ծավալը դեռևս ամբողջությամբ չի փոխում ընդհանուր դժգոհությունների պատկերը։