Որքան հավելավճար կստանան ՍԴ դատավորները․ պարզաբանում

Գործող վարձատրության համակարգում փոփոխություններ չեն իրականացվում։

Սահմանադրական դատարանի դատավորներին և նրանց տեղակալներին նախատեսվում է հատկացնել շուրջ 46 մլն դրամ հավելավճարներ։ Այս մասին անդրադարձ է կատարվել ԱԺ-ում քննարկումների ընթացքում։

Արդարադատության նախարար Սրբուհի Գալյանը պարզաբանել է, որ խոսքը վերաբերում է օրենքով սահմանվող վարձատրության բաղադրիչներին, այս դեպքում՝ հավելավճարներին։

Նրա խոսքով՝ գործող վարձատրության համակարգում փոփոխություններ չեն իրականացվում, քանի որ գործակիցներ սահմանող օրենսդրությունը ենթակա է ամբողջական վերանայման՝ հանրային կառավարման բարեփոխումների շրջանակում։

Նախարարը նշել է, որ հավելավճարների հաշվարկման մեխանիզմները ներկայում կիրառվում են որպես միջանկյալ լուծում՝ մինչև համակարգային փոփոխությունների ընդունումը։

Նա նաև ընդգծել է, որ հավելավճարների չափը կախված է դատավորների ստաժից։

Այս որոշումը վերաբերում է պետական պաշտոն զբաղեցնող անձանց վարձատրության համակարգի անցումային փուլին՝ մինչև համապատասխան օրենսդրական փոփոխությունների իրականացումը։