ԱՄՆ-ը 2 մլրդ դոլար է ծախսել Պենտագոնի բյուջեից միգրանտների դեմ պայքարի համար

Թրամփի կողմից ներգաղթի հարցերում զինվորականների օգտագործումը անցնում է «բոլոր խելամիտ սահմանները»։

ԱՄՆ նախագահ Դոնալդ Թրամփի վարչակազմը նախորդ ֆինանսական տարում պաշտպանության նախարարության բյուջեից 2 միլիարդ դոլար է հատկացրել միգրանտների դեմ պայքարին եւ նախատեսում է գումարը կրկնապատկել ընթացիկ ֆինանսական տարում (որը ԱՄՆ-ում սկսվել է հոկտեմբերի 1-ին): Այս մասին նշվել է Կոնգրեսի երկու պալատների մի քանի դեմոկրատների հինգշաբթի հրապարակած համատեղ զեկույցում։

Նրանք քննադատել են նախագահին՝ իրենց կարծիքով, սահմանային խիստ նախաձեռնություններին առաջնահերթություն տալու համար՝ պաշտպանական կարողությունների զարգացման եւ արտակարգ իրավիճակներին արձագանքման հաշվին: Զեկույցում նշվել է, որ Պենտագոնի 2026թ․ բյուջեի հայտը ներառում է առնվազն 5 միլիարդ դոլար ԱՄՆ-Մեքսիկա սահմանին միգրանտների դեմ պայքարի գործողությունների համար: Օրենսդիրների տվյալներով՝ Պենտագոնը նախորդ ֆինանսական տարում 1.3 միլիարդ դոլար է հատկացրել սահմանային զորքերի տեղակայմանը, 420.9 միլիոն դոլար՝ ներգաղթյալների կալանավորման համար՝ երկրի ներսում եւ արտերկրում գտնվող ռազմական օբյեկտներում, 258 միլիոն դոլար՝ ԱՄՆ քաղաքներում, ինչպիսիք են Լոս Անջելեսը, Պորտլենդը եւ Չիկագոն, զորքերի տեղակայման համար եւ 40.3 միլիոն դոլար՝ ԶՈւ իրականացրած արտաքսման թռիչքների համար։

Կոնգրեսի անդամները կարծում են, որ Թրամփի կողմից ներգաղթի հարցերում զինվորականների օգտագործումը անցնում է «բոլոր խելամիտ սահմանները», նվազեցնում է զորքերի պատրաստությունը եւ հանգեցնում է անարդյունավետ ծախսերի՝ գերատեսչությունների միջեւ ռեսուրսների ավելի արդյունավետ բաշխման փոխարեն: «Երբ զինվորականներին հանձնարարվում է ներգաղթի վերահսկողությունը՝ դեր, որն անհամատեղելի է պաշտպանության նախարարության առաքելության հետ, որի համար զինծառայողներ չեն հավաքագրվում կամ չեն մարզվում, նման գործողությունները հաճախ մի քանի անգամ ավելի թանկ են նստում, քան երբ նույն գործառույթները կատարում են քաղաքացիական իշխանությունները»,- նշվել է զեկույցում:

Զեկույցը մեկնաբանելով՝ Սպիտակ տունը նշել է, որ «[Միգրացիայի դեմ պայքարի] առաքելության համար հատկացված միջոցները ծախսելը չի ​​նշանակում, թե մյուս առաքելությունները կմնան առանց ֆինանսավորման», եւ ավելացրել է, որ դեմոկրատներն իրենք եւ ԱՄՆ 46-րդ նախագահ Ջո Բայդենն են մեղավոր Պենտագոնի միջոցները ներգաղթի հարցերը լուծելու նպատակով օգտագործելու համար: