Ուկրաինական հակամարտության շարունակումը կարող է հանգեցնել երրորդ համաշխարհային պատերազմի. Թրամփ

Միացյալ Նահանգներն արդեն մոտ է Ռուսաստանի եւ Ուկրաինայի հետ համաձայնության գալուն։

ԱՄՆ նախագահ Դոնալդ Թրամփը հնարավոր է համարել, որ Ուկրաինայում հակամարտության շարունակումը կարող է հանգեցնել երրորդ համաշխարհային պատերազմի: «Ես շատ կցանկանայի տեսնել, որ այն ավարտվի, եւ մենք ամեն ջանք գործադրում ենք դրա համար: Դա առանձնապես չի ազդի Միացյալ Նահանգների վրա, եթե իրավիճակը դուրս չգա վերահսկողությունից: Սրանք այն բաներն են, որոնք կարող են հանգեցնել երրորդ համաշխարհային պատերազմի»,  ասել է նա Սպիտակ տանը լրագրողների հետ հանդիպման ժամանակ։

Թրամփը նաեւ նշել է, որ Միացյալ Նահանգներն արդեն մոտ է Ռուսաստանի եւ Ուկրաինայի հետ համաձայնության գալուն։

Ուկրաինայի շուրջ բանակցությունները սրվել են այն բանից հետո, երբ Վաշինգտոնը նոյեմբերին առաջարկել է իր 28 կետանոց ծրագիրը: Կիեւը եւ նրա գործընկերները Եվրոպայում դժգոհություն են հայտնել փաստաթղթի վերաբերյալ եւ փորձել են էականորեն փոխել այն: Ավելի ուշ Թրամփը հայտնել է, որ սկզբնական ծրագիրը վերանայվել է՝ հաշվի առնելով Մոսկվայի եւ Կիեւի դիրքորոշումները, մնացել են միայն մի քանի վիճելի հարցեր: Ամերիկացի ներկայացուցիչները բանակցություններ են վարել ուկրաինական պատվիրակության հետ Ֆլորիդայում եւ ռուսական կողմի հետ՝ Մոսկվայում։

Դեկտեմբերի 8-ին Ուկրաինայի նախագահ Վլադիմիր Զելենսկին խոստացել է ԱՄՆ-ին ներկայացնել մինչեւ 20 կետ կրճատված  խաղաղության ծրագիր, որը մշակվել է եվրոպացի առաջնորդների հետ իր հանդիպման ժամանակ: Դեկտեմբերի 10-ին նրանք Թրամփին ներկայացրել են Ուկրաինային տարածքային զիջումների առաջարկ՝ հակամարտության կարգավորման ծրագրի շրջանակում։