Իրանը կվերսկսի ԱՄՆ-ի հետ բանակցությունները Ժնևում՝ արդար համաձայնության հասնելու նպատակով

Նրա խոսքով՝ ստեղծվել է «աննախադեպ համաձայնագիր կնքելու պատմական հնարավորություն»:

Իրանի արտաքին գործերի նախարար Աբաս Արաղչին հայտարարել է, որ նախորդ փուլում ձեռք բերված պայմանավորվածությունների հիման վրա Թեհրանը Ժնևում կվերսկսի բանակցությունները Միացյալ Նահանգների հետ՝ հնարավորինս շուտ արդար համաձայնության հասնելու նպատակով։

«Մեր հիմնարար համոզմունքները շատ պարզ են. Իրանը ոչ մի պարագայում չի մշակի միջուկային զենք, և մենք՝ իրանցիներս, երբեք չենք հրաժարվի մեր ժողովրդի համար խաղաղ միջուկային տեխնոլոգիաների առավելություններից օգտվելու իրավունքից»,- գրել է Արաղչին սոցիալական ցանցերում։

Նրա խոսքով՝ ստեղծվել է «աննախադեպ համաձայնագիր կնքելու պատմական հնարավորություն», որը կարող է փարատել փոխադարձ մտահոգությունները և ապահովել փոխշահավետ արդյունք։

«Գործարքը հասանելի է, բայց միայն այն դեպքում, եթե առաջնահերթությունը տրվի դիվանագիտությանը։ Մենք ապացուցել ենք, որ կանգ չենք առնի ոչ մի բանի առջև՝ մեր ինքնիշխանությունը պաշտպանելու համար։ Նույնպիսի քաջությամբ նստում ենք բանակցությունների սեղանի շուրջ և ձգտելու ենք ցանկացած տարաձայնության խաղաղ կարգավորմանը»,- նշել է Իրանի ԱԳ նախարարը։