Դեկտեմբերի 23-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Սևանա լճում մեկնարկել է 2026 թվականի արդյունագործական ձկնորսության հայտերի ընդունումը
Շրջակա միջավայրի նախարարությունից հայտնում են, որ մեկնարկել է Սևանա լճում 2026 թվականի արդյունագործական ձկնորսության հայտերի ընդունումը։ Կառավարության որոշման նախագծով առաջարկվում է 2026 թվականի փետրվարի 1-ից նոյեմբերի 20-ն ընկած ժամանակահատվածում թույլատրել մինչև 550 տոննա ձկնորսություն։ Միաժամանակ նշվում է, որ 2026 թվականին Սևանա լճում խեցգետնի և այլ ձկնատեսակների արդյունագործական որսի չափաքանակ չի սահմանվել։

ՀՀ վարկային կազմակերպությունների տրամադրած վարկերը գերազանցել են 412 մլրդ դրամը
2025 թվականի հոկտեմբերի վերջի դրությամբ ՀՀ վարկային կազմակերպությունների կողմից տրամադրված վարկերի ընդհանուր ծավալը կազմել է 412.2 մլրդ դրամ։ Նախորդ տարվա նույն ժամանակահատվածի համեմատ վարկերի ծավալն աճել է գրեթե 20 տոկոսով։

Հայաստանում գրանցված աշխատողների թիվը կազմել է ավելի քան 806 հազար
2025 թվականի սեպտեմբերի դրությամբ Հայաստանում գործել է 65,596 կազմակերպություն, որտեղ գրանցված աշխատողների թիվը կազմել է 806,488։ Միջին ամսական աշխատավարձը կազմել է 288,097 դրամ։

Ռուսաստանը կրկին առաջինն է Հայաստան այցելող զբոսաշրջիկների թվով
2025 թվականի հունվար-նոյեմբերին Հայաստան է այցելել 874,115 ռուսաստանցի զբոսաշրջիկ, ինչը կազմում է ընդհանուր զբոսաշրջային հոսքի 41 տոկոսը։ Երկրորդ տեղում Վրաստանն է, երրորդում՝ Իրանը։

ՄԻՋԱԶԳԱՅԻՆ ԼՈՒՐԵՐ

Turkish Airlines-ը 2026 թվականի մարտից կսկսի ուղիղ չվերթներ դեպի Երևան
Turkish Airlines ավիաընկերությունը 2026 թվականի մարտի 11-ից կսկսի ուղիղ չվերթներ իրականացնել Ստամբուլ-Երևան ուղղությամբ։ Չվերթների հաճախականությունը փուլային կերպով կավելանա՝ հասնելով շաբաթական 14-ի։

ԱՄՆ-ն կամավոր երկիրը լքող անօրինական ներգաղթյալներին կվճարի մինչև 3000 դոլար
ԱՄՆ կառավարությունը հայտարարել է ծրագրի մասին, որով կամավոր երկիրը լքող անօրինական ներգաղթյալները կստանան մինչև 3000 դոլար և անվճար ավիատոմսեր դեպի իրենց ծագման երկիր։ Ծրագրի նպատակն է նվազեցնել արտաքսման բարձր ծախսերը։

OpenAI-ը պատրաստվում է ներգրավել մինչև 100 մլրդ դոլար
OpenAI-ը բանակցում է նոր ֆինանսավորման փուլի շուրջ՝ մինչև 100 մլրդ դոլար ներգրավելու նպատակով։ Գործարքի արդյունքում ընկերության գնահատված շուկայական արժեքը կարող է հասնել 750–830 մլրդ դոլարի։

Վրաստանի տնտեսությունը երրորդ եռամսյակում աճել է 6.4 տոկոսով
2025 թվականի երրորդ եռամսյակում Վրաստանի ՀՆԱ-ի իրական աճը կազմել է 6.4 տոկոս։ Տնտեսության կառուցվածքում առաջատար են առևտրի և վերամշակող արդյունաբերության ոլորտները։

ԵԱՏՄ երկրների ՀՆԱ-ի աճը 2025 թվականին կկազմի 2 տոկոս
ԵԱՏՄ երկրների համախառն ներքին արդյունքի ընդհանուր աճը 2025 թվականին ակնկալվում է 2 տոկոս։ Միության շրջանակում փոխադարձ ուղիղ ներդրումների ծավալը արդեն գերազանցել է 20 մլրդ դոլարը։