ՀՀ–ՌԴ առևտրատնտեսական համագործակցությունը գտնվում է բարձր մակարդակի վրա․ Մատվիենկո

Դաշնային խորհրդի նախագահը կարևորել է խորհրդարանական երկխոսության դերը։

Հայաստանի և Ռուսաստանի միջև առևտրատնտեսական համագործակցությունը գտնվում է բարձր մակարդակի վրա։ Այդ մասին հայտարարել է Ռուսաստանի Դաշնության Դաշնային խորհրդի նախագահ Վալենտինա Մատվիենկոն՝ ամփոփելով Հայաստանի Ազգային ժողովի նախագահ Ալեն Սիմոնյանի հետ հանդիպման արդյունքները։

Մատվիենկոյի խոսքով՝ Հայաստանի արտաքին առևտրաշրջանառության գրեթե 33 տոկոսը բաժին է ընկնում Ռուսաստանին, ինչը, նրա գնահատմամբ, վկայում է երկու երկրների միջև տնտեսական կապերի ինտենսիվության մասին։

Նա նշել է, որ վերջին տարիներին ռուսական բիզնեսի կողմից Հայաստանում իրականացվել է ավելի քան 4 միլիարդ դոլարի ներդրում՝ շուրջ 40 ներդրումային նախագծերի շրջանակում։ Դրանք ընդգրկում են տարբեր ոլորտներ և նպատակ ունեն խորացնել երկկողմ տնտեսական համագործակցությունը։

Դաշնային խորհրդի նախագահը կարևորել է խորհրդարանական երկխոսության դերը՝ ընդգծելով, որ առանց այդ համագործակցության դժվար է ապահովել առևտրատնտեսական հարաբերությունների շարունակական զարգացումը։