Ամերիկյան Estée Lauder կոսմետիկայի ընկերությունը ձեռք է բերում Tom Ford նորաձեւության տունը։ Այս մասին հայտնում է NY Times-ը։ Կոսմետիկայի և օծանելիքի ամերիկյան արտադրող Estée Lauder-ը, որի պորտֆելում արդեն ընդգրկված են MAC Cosmetics, Clinique, Aramis և DKNY ապրանքանիշերը, պայմանագիր է ստորագրել Tom Ford նորաձեւության տունը գնելու մասին։ Գործարքից հետո ընկերությունը կդառնա ապրանքանիշի և նրա մտավոր սեփականության միակ սեփականատերը:
Հաղորդվում է, որ գործարքի գումարը կկազմի 2,8 մլրդ դոլար:Tom Ford նորաձեւության տան գնումը կդառնա ամենամեծը Estée Lauder-ի պատմության մեջ։ Գործարքի պայմանների համաձայն ՝ ապրանքանիշի հիմնադիր և գործադիր տնօրեն Թոմ Ֆորդը կշարունակի աշխատել որպես ստեղծագործական խոսնակ մինչև 2023 թվականի վերջ։ Estée Lauder-ի ՝ Tom Ford նորաձեւության տունը գնելու մտադրության մասին հայտնի դարձավ անցյալ շաբաթ։ Նախկինում այն փորձել էր ձեռք բերել ֆրանսիական Kering հոլդինգը, որին պատկանում են Balenciaga, Gucci, Saint Laurent, Bottega Veneta եւ Brioni ապրանքանիշերը։
