Փետրվարի 20-ի բիզնես լուրերը

ՏԵՂԱԿԱՆ ԼՈՒՐԵՐ

Ինչո՞ւ Հայաստանի ավիաոլորտը մնաց ԵՄ «սև ցուցակում»

2020 թվականին Եվրոպական հանձնաժողովը հայկական բոլոր ավիաընկերություններին ներառեց թռիչքների անվտանգության «սև ցուցակում»։ ՀՀ տարածքային կառավարման և ենթակառուցվածքների նախարար Դավիթ Խուդաթյանի հայտարարությամբ՝ Հայաստանը դեռևս դուրս չի գա ցուցակից, քանի որ հայտնաբերվել են նոր խախտումներ։
Քաղաքացիական ավիացիայի կոմիտեից հայտնում են, որ վերջին այցի ընթացքում արձանագրված թերությունները չեն կրկնում 2020թ. արձանագրված խնդիրները և հիմնականում վերաբերում են օդանավ շահագործողների սերտիֆիկացման և վերահսկողության գործընթացում որոշ բացերին, մասնավորապես՝ որակի ապահովման համակարգի ոչ ամբողջական կիրառմանը։

Հայաստանն ու Վրաստանը քննարկել են առևտրի, տարանցման և զբոսաշրջության հարցեր

ՀՀ էկոնոմիկայի նախարար Գևորգ Պապոյանը և Վրաստանի էկոնոմիկայի նախարար Մարիամ Կվրիվիշվիլին քննարկել են տնտեսական համագործակցության խորացման առաջնահերթությունները։ Քննարկման առանցքում եղել են առևտրատնտեսական կապերի ընդլայնումը, բեռների անխոչընդոտ տարանցումը և զբոսաշրջության զարգացումը։

Հայաստանի տնտեսական աճը 2025 թվականին կազմել է 7.2%

ՀՀ էկոնոմիկայի նախարար Գևորգ Պապոյանի տվյալներով՝ 2025 թվականին Հայաստանի տնտեսական աճը կազմել է 7.2%։ Ավելի վաղ վարչապետ Նիկոլ Փաշինյանը հայտարարել էր առնվազն 6% աճի մասին։

2025թ. հունվար-նոյեմբերին Հայաստանի արտահանման ծավալը կազմել է 7.35 մլրդ դոլար

Հաշվետու ժամանակահատվածում արտահանման ծավալը կազմել է 7.35 մլրդ դոլար։ Առաջատար ուղղությունը Ռուսաստանի Դաշնությունն է՝ 2.73 մլրդ դոլար, երկրորդ տեղում՝ ԱՄԷ-ն՝ 1.7 մլրդ դոլար, երրորդում՝ Չինաստանը՝ 648.5 մլն դոլար։

ՄԻՋԱԶԳԱՅԻՆ ԼՈՒՐԵՐ

ԵՀ-ն արտահերթ նիստ է գումարել «Դրուժբա» նավթատարի շուրջ վեճի պատճառով

Եվրոպական հանձնաժողովը արտահերթ նիստ է գումարել «Դրուժբա» նավթատարի շուրջ Հունգարիայի, Սլովակիայի և Ուկրաինայի միջև առաջացած վեճը քննարկելու համար։ Հունգարիան և Սլովակիան մեղադրել են Ուկրաինային վերանորոգման աշխատանքները քաղաքական պատճառներով ձգձգելու մեջ։

Թրամփը հայտնել է, որ ԱՄՆ-ը Վենեսուելայից 50 մլն բարել նավթ է ստացել

Դոնալդ Թրամփը հայտարարել է, որ ԱՄՆ-ը Վենեսուելայից ստացել է 50 մլն բարել նավթ։ Նրա խոսքով՝ այդ գործարքի ֆինանսական հոսքերը վերահսկվելու են ԱՄՆ կողմից։

16 տարին լրացած ներգաղթային վիզայի բոլոր դիմողները պետք է ներկայացնեն դատվածություն չունենալու տեղեկանք

ԱՄՆ դեսպանատան հաղորդմամբ՝ 16 տարին լրացած բոլոր ներգաղթային վիզայի դիմողները պարտավոր են ներկայացնել դատվածություն չունենալու մասին տեղեկանք՝ տրված վերջին 24 ամիսների ընթացքում և ընդգրկող դիմողի բոլոր անունները։

Հունվարին Վրաստան է ներմուծվել 1.1 մլրդ դոլարի ապրանք

2026 թվականի հունվարին Վրաստանի ներմուծումը կազմել է 1.1 մլրդ դոլար՝ նախորդ տարվա համեմատ նվազելով 33.7%-ով։ Առաջատար ներմուծման երկրներն են Թուրքիան, Չինաստանը և Ռուսաստանը։

Amazon-ը դարձել է ԱՄՆ ամենամեծ ընկերությունը տարեկան հասույթով

Amazon-ը 2025 թվականի արդյունքներով դարձել է ԱՄՆ ամենախոշոր ընկերությունը տարեկան հասույթով՝ գրանցելով 716.9 մլրդ դոլար։ Walmart-ի հասույթը կազմել է 713.2 մլրդ դոլար։ Amazon-ի տարեկան աճը կազմել է 12.4%։