Հայաստանում արձանագրվել է սուր շնչառական վարակների ակտիվացում

Չորս հիվանդ (բոլորը՝ մինչև 5 տարեկան) տեղափոխվել են ինտենսիվ թերապիայի բաժանմունք։

«Հերացի վերլուծական» կենտրոնը ներկայացրել է Հայաստանում սուր շնչառական վարակների (ՍՇՎ) 7-րդ շաբաթվա համաճարակաբանական վերլուծությունը՝ արձանագրելով դեպքերի որոշակի ակտիվացում բոլոր տարիքային խմբերում։

ԵՊԲՀ «Հերացի» թիվ 1 և «Մուրացան» հիվանդանոցային համալիրներում, ինչպես նաև Միքայելյան վիրաբուժության ինստիտուտում հոսպիտալացված դեպքերի տվյալներով՝ 2026 թվականի փետրվարի 9-15-ը ծանր սուր շնչառական վարակների (ԾՍՇՎ) 78 նոր դեպք է արձանագրվել։ Սա նախորդ շաբաթվա համեմատ աճել է 18%-ով։

ԾՍՇՎ-ով նոր դեպքերը կազմել են ընդհանուր հոսպիտալացվածների 9%-ը՝ նախորդ շաբաթվա 7,4%-ի փոխարեն։ Դեպքերի 55%-ը (43 դեպք) գրանցվել է մինչև 5 տարեկանների շրջանում, ինչը նույնպես աճ է նախորդ շաբաթվա 50%-ի համեմատ։

Տարիքային բաշխումը հետևյալն է․

• 5-14 տարեկաններ՝ 40% (31 դեպք),

• 15-29 տարեկաններ՝ 4% (3 դեպք),

• 30-64 տարեկաններ՝ 1% (1 դեպք)։

Չորս հիվանդ (բոլորը՝ մինչև 5 տարեկան) տեղափոխվել են ինտենսիվ թերապիայի բաժանմունք։

Նշված ժամանակահատվածում գրիպի նկատմամբ հետազոտվել է ԾՍՇՎ-ով 8 նոր դեպք։ Մահվան դեպքեր չեն արձանագրվել։

Պաշտոնական տվյալներով՝ Հայաստանում շարունակում են շրջանառվել ռեսպիրատոր սինցիտիալ վիրուսը (RSV), ռինովիրուսը, մետապնևմովիրուսը և պարագրիպի հարուցիչները։

Հիվանդությունների վերահսկման և կանխարգելման եվրոպական կենտրոնի (ECDC) տվյալներով՝ 2026 թվականի փետրվարի 2-8-ը եվրոպական տարածաշրջանում գրիպի ցուցանիշները շարունակում են նվազել սեզոնի սկզբի բարձր մակարդակից։

Տարածաշրջանում գերակշռող է A(H3) գրիպի վիրուսը՝ 77%, իսկ A(H1)-ը կազմում է 23%։ Գրիպի դրական թեստերի տարածաշրջանային մակարդակը կազմել է 28%՝ նախորդ շաբաթվա 33%-ի փոխարեն։

SARS-CoV-2 վարակի ակտիվությունը պահպանվել է 3% մակարդակում, իսկ RSV-ի դրական նմուշների մակարդակը կազմել է 10%։ Մինչև 5 տարեկան երեխաները շարունակում են կազմել դեպքերի հիմնական մասը։