Ուսուցիչների կամավոր ատեստավորմանը հատկացվող գումարն ավելացավ ևս 2.16 մլրդ դրամով

2025 թվականին ատեստավորման համար դիմել է ավելի քան 8400 ուսուցիչ:

Ուսուցիչների կամավոր ատեստավորման համակարգին հատկացվող գումարն ավելացավ ևս 2.16 մլրդ դրամով: Որոշումն ընդունվեց ՀՀ կառավարության դեկտեմբերի 4-ի նիստում:

«Կամավոր ատեստավորված ուսուցիչների խրախուսման համար 2025 թվականին պլանավորված էր շուրջ 8 մլրդ 673 մլն 771 հազար 400 դրամ, ներկայացված նախագծով մենք առաջարկում ենք լրացնել գումարը ևս շուրջ 2.16 մլրդ դրամով, ինչը նշանակում է, որ միայն կամավոր ատեստավորման համակարգին 2025 թվականին կուղղվի ավելի քան 10 մլրդ դրամ»,-ասաց ՀՀ կրթության, գիտության, մշակույթի և սպորտի նախարար Ժաննա Անդրեասյանը:

Նախարար Անդրեասյանն ընդգծեց՝ արդեն կարելի է փաստել, որ կամավոր ատեստավորման համակարգը կայացել և զարգանում է:

«Այսօր արդեն 700 հազար դրամ ստացող ուսուցիչները մեր իրականության մաս են»,-նշեց ԿԳՄՍ նախարարը:

Ժաննա Անդրեասյանը հայտնեց, որ 2025 թվականին ատեստավորման համար դիմել է ավելի քան 8400 ուսուցիչ: