Մարտի 6-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

ԱՄՆ-ում ՀՀ դեսպանը մասնակցել է «OpenAI Education» գագաթաժողովին

ԱՄՆ-ում ՀՀ դեսպան Նարեկ Մկրտչյանը Սան Ֆրանցիսկոյում՝ OpenAI ընկերության կենտրոնակայանում, մասնակցել է «OpenAI Education» գագաթաժողովին։ Քննարկվել են կրթության և արհեստական բանականության ոլորտներում հնարավոր համագործակցության հեռանկարները։

2026թ. հունվարին պետական բյուջեի ծախսերը կազմել են 151.4 մլրդ դրամ

ՀՀ վիճակագրական կոմիտեի տվյալներով՝ 2026 թվականի հունվարին պետական բյուջեի ծախսերը կազմել են 151,444.9 մլն դրամ, ինչը նախորդ տարվա նույն ժամանակահատվածի համեմատ աճել է 9.3%-ով։ Պաշտպանության ոլորտի ծախսերը նվազել են 64.8%-ով։

ԶՊՄԿ-ում ձևավորվել է նոր հանձնաժողով

Զանգեզուրի պղնձամոլիբդենային կոմբինատում ստեղծվել է «Կայուն զարգացման, ԲՍԿ և ռիսկերի» հանձնաժողով։ Այն զբաղվելու է ընկերության ռիսկերի կառավարման, կայուն զարգացման ռազմավարության և ESG ուղղությունների վերահսկմամբ։

Քննարկվել են կահույքագործության ոլորտի զարգացման հնարավորությունները

Էկոնոմիկայի նախարարությունում քննարկվել են Հայաստանում կահույքագործության ոլորտի զարգացման հեռանկարները։ Ներկայացվել են պետական աջակցության ծրագրերը՝ ներառյալ լիզինգի աջակցությունը, արտահանման խթանման ծրագրերը և մաքսատուրքից ազատման հնարավորությունները։

Մաքսատուրքից ազատում՝ ներդրումային ծրագրերի համար

Հայաստանում ներդրումային ծրագրեր իրականացնող կազմակերպությունները կարող են մաքսատուրքից ազատմամբ ներմուծել տեխնոլոգիական սարքավորումներ, հումք և նյութեր։ Ծրագիրը վերաբերում է գյուղատնտեսության, արդյունաբերության, ՏՏ-ի, զբոսաշրջության, էներգետիկայի և այլ գերակա ոլորտներին։

ՄԻՋԱԶԳԱՅԻՆ ԼՈՒՐԵՐ

ԱՄԷ բանկային համակարգը կայուն է

ԱՄԷ Կենտրոնական բանկը հայտարարել է, որ երկրի բանկային և ֆինանսական ոլորտը շարունակում է պահպանել բարձր դիմադրողականություն։ Միաժամանակ քննարկվում է իրանական ակտիվների հնարավոր սառեցումը։

Ռուսաստանում միջին աշխատավարձը գերազանցել է 100 հազար ռուբլին

2025 թվականին Ռուսաստանում միջին ամսական աշխատավարձը առաջին անգամ գերազանցել է 100,000 ռուբլին՝ կազմելով 100,360 ռուբլի։

ԱՄՆ-ը ժամանակավոր թույլտվություն է տվել Հնդկաստանին ռուսական նավթ գնելու համար

ԱՄՆ ֆինանսների նախարարությունը 30-օրյա թույլտվություն է տվել հնդկական նավթավերամշակող գործարաններին ռուսական նավթ գնելու համար՝ համաշխարհային շուկայում նավթի մատակարարումների կայունությունն ապահովելու նպատակով։

Ալյումինի գինը հասել է 4 տարվա առավելագույնին

Հորմուզի նեղուցի շուրջ լարվածության պատճառով ալյումինի գինը բարձրացել է մինչև 3418.5 դոլար մեկ տոննայի դիմաց՝ հասնելով վերջին չորս տարվա ամենաբարձր մակարդակին։