Կանգնած ենք տեխնոլոգիական համայնքի կողքին․ ԲՏԱ նախարար

Պետությունը ոլորտային միությունների հետ համագործակցությանը մոտենում է համակարգված ձևով։

Փետրվարի 3-ին ՀՀ բարձր տեխնոլոգիական արդյունաբերության նախարար Մխիթար Հայրապետյանի մասնակցությամբ տեղի է ունեցել ՏՀՏ գործատուների միության նոր անդամներին նվիրված միջոցառում։ Այդ մասին հայտնել են ՀՀ բարձր տեխնոլոգիական արդյունաբերության նախարարությունից։

Միջոցառման ընթացքում ներկայացվել են միությանը միացած նոր կազմակերպությունները, ինչպես նաև դրանց գործունեության հիմնական ուղղությունները։ Քննարկումները կենտրոնացել են տեխնոլոգիական ոլորտի զարգացման ընթացիկ միտումների և համագործակցության հնարավորությունների վրա։

Ողջույնի խոսքով հանդես գալով՝ նախարար Հայրապետյանը կարևորել է ՏՀՏ գործատուների միության դերը տեխնոլոգիական ոլորտում՝ այն ներկայացնելով որպես պետություն–մասնավոր հատված փոխգործակցության ձևաչափ։ Նրա խոսքով՝ ոլորտի կայուն և երկարաժամկետ զարգացումը կախված է փոխլրացնող մոտեցումներից և համատեղ աշխատանքի մեխանիզմներից։

Նախարարն ընդգծել է, որ պետությունը ոլորտային միությունների հետ համագործակցությանը մոտենում է համակարգված ձևով՝ նպատակ ունենալով խուսափել գործառույթների կրկնությունից և ապահովել նախաձեռնությունների արդյունավետ իրականացում։ Նա նաև հայտնել է, որ նախարարությունը շարունակելու է համագործակցությունը ՏՀՏ գործատուների միության և տեխնոլոգիական համայնքի հետ։

Միջոցառման ընթացքում միության նոր անդամները ներկայացրել են իրենց կազմակերպությունների գործունեությունը, զարգացման տեսլականը և առաջնահերթ ուղղությունները։

Խոսքով է հանդես եկել նաև Armenian Innovation Foundation-ի ներկայացուցիչ Լևոն Թադևոսյանը, որը ներկայացրել է հիմնադրամի գործունեությունը և տեխնոլոգիական էկոհամակարգի զարգացմանն ուղղված նախաձեռնությունները։