ՊԵԿ-ը հրապարակել է էլեկտրական ավտոմեքենաների մաքսատուրքի արտոնությունից օգտվելու նոր ցանկը

Նախքան դիմումը ներկայացնելը խորհուրդ է տրվում ստուգել տրամադրվող տվյալների ճշգրտությունը։

ՀՀ պետական եկամուտների կոմիտեն տեղեկացնում է, որ ՀՀ կառավարության 2024 թվականի նոյեմբերի 28-ի N 1876-Ն որոշման 2.2-րդ կետի համաձայն՝ Կոմիտեի կողմից 2026 թվականի հունվարի 9-ին հրապարակված 636 էլեկտրաշարժիչով շարժիչային տրանսպորտային միջոցներից 575-ի մասով սահմանված ժամկետում ներկայացվել են դիմումներ՝ վճարված մաքսատուրքի գումարը հետ ստանալու համար։ Մնացած 61 տրանսպորտային միջոցների գծով դիմումներ չեն ներկայացվել։

Հաշվի առնելով այդ հանգամանքը՝ նույն որոշման 2.4-րդ կետի հիման վրա ՊԵԿ-ը, ժամանակագրական հաջորդականության սկզբունքով (սկսած 637-րդ համարից), հրապարակել է այն 61 էլեկտրաշարժիչով տրանսպորտային միջոցների ցանկը, որոնց հայտարարատուները ստանում են հնարավորություն օգտվելու սակագնային արտոնությունից։

Խոսքը վերաբերում է ԱՏԳ ԱԱ 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների ներմուծմանը։ Արտոնությունից օգտվելու համար անհրաժեշտ է մաքսային հայտարարագրի և (կամ) մաքսային մուտքի օրդերի փոփոխում։

ՊԵԿ-ը տեղեկացնում է, որ հրապարակված ցանկում ընդգրկված տրանսպորտային միջոցների հայտարարատուները մաքսատուրքի գումարը հետ ստանալու նպատակով պետք է մինչև 2026 թվականի մարտի 31-ը ներառյալ դիմեն Մաքսային մարմին։ Դիմումները պետք է ուղարկվեն [email protected] էլեկտրոնային հասցեին՝ սահմանված ձևաչափով։

Միաժամանակ նշվում է, որ դիմումները պետք է ներկայացվեն տվյալ տրանսպորտային միջոցների հայտարարատու հանդիսացած սուբյեկտների կողմից, իսկ դիմումում նշված բանկային հաշվեհամարը պետք է պատկանի հենց հայտարարատուին։ Նախքան դիմումը ներկայացնելը խորհուրդ է տրվում ստուգել տրամադրվող տվյալների ճշգրտությունը։