Հունվարի 27-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Երբ մեծ գումարները երկրի սահմաններից դուրս են, վտանգվա՞ծ են պետական շահերը․ էկոնոմիկայի նախարարի անդրադարձը
ՀՀ էկոնոմիկայի նախարար Գևորգ Պապոյանը ֆեյսբուքյան գրառմամբ անդրադարձել է կապիտալի տեղակայմանն ու դրա հնարավոր ազդեցությանը քաղաքական որոշումների վրա։ Նրա խոսքով՝ խոշոր կապիտալի զգալի մասի տեղակայումը այլ երկրներում կարող է ձևավորել շահերի կենտրոն, որը գտնվում է տվյալ պետությունից դուրս և ազդել պետական շահերի հետ առնչվող քաղաքական գործընթացների վրա։

2025 թվականին Հայաստանի արտաքին պարտքը գրանցել է ռեկորդային աճ
2025 թվականին Հայաստանի արտաքին պարտքը գրանցել է ռեկորդային աճ։ Միայն երրորդ եռամսյակում արձանագրվել է մոտ 6,903 միլիարդ դրամ ցուցանիշ, ինչը նշանակում է շուրջ 10% տարեկան աճ։ Մասնագետների գնահատմամբ՝ կարճաժամկետում սա կարող է ապահովել ծախսերի կայունություն, սակայն երկարաժամկետում մեծացնում է մակրոտնտեսական ռիսկերը։

2025թ. նոյեմբերի վերջի դրությամբ Հայաստանում փողի բազան կազմել է 1,958,869 մլն դրամ
Կանխիկ դրամի ծավալն աճել է 17.2%-ով՝ կազմելով 1,080,927 մլն դրամ։ Դրամով թղթակցային հաշիվները նվազել են 13.5%-ով, իսկ արտարժույթով թղթակցային հաշիվները աճել են 34.4%-ով։ Տվյալները ներկայացրել է Վիճակագրական կոմիտեն։

2025թ.-ի հոկտեմբերի դրությամբ Հայաստանում գրանցված է 810,052 աշխատակից
Հայաստանում գործող 65,357 կազմակերպություններում գրանցվել է 810,052 աշխատակից։ Նրանց միջին ամսական աշխատավարձը կազմել է 293,729 դրամ։

Հայաստանի պետական բյուջեում կլիմայի փոփոխությանն առնչվող ծախսերը կազմել են 3.4%
Շրջակա միջավայրի նախարարության տվյալներով՝ ցուցանիշը չի ներառում միջազգային ծրագրերը, ինչի արդյունքում իրական ներդրումը կլիմայի օրակարգում ավելի բարձր է։

ՄԻՋԱԶԳԱՅԻՆ ԼՈՒՐԵՐ

Թրամփը հայտարարել է հարավկորեական ապրանքների մաքսատուրքերի բարձրացման մասին
ԱՄՆ նախագահ Դոնալդ Թրամփը հայտարարել է Հարավային Կորեայից ներմուծվող ապրանքների մաքսատուրքերի բարձրացման մասին՝ 15%-ից մինչև 25%։ Պատճառը Վաշինգտոնի հետ առևտրային համաձայնագրի պարտավորությունների չկատարումն է։

ԵՄ–Հնդկաստան առևտրային համաձայնագիրը կվերացնի մինչև 4 մլրդ եվրոյի մաքսատուրքեր
ԵՄ-ն և Հնդկաստանը ստորագրել են համաձայնագիր, որի արդյունքում ԵՄ-ից Հնդկաստան արտահանվող ապրանքների շուրջ 96.6%-ի մաքսատուրքերը կկրճատվեն կամ կվերացվեն։ Սա կարող է կրկնապատկել արտահանման ծավալները։

ԵՄ խորհուրդը հաստատել է ռուսական գազի ներմուծման արգելքը
ԵՄ-ը կդադարեցնի ռուսական հեղուկացված բնական գազի ներմուծումը մինչև 2026թ. վերջը, իսկ խողովակաշարային գազինը՝ մինչև 2027թ. սեպտեմբերի 30-ը։ Որոշ դեպքերում հնարավոր է ժամկետի երկարաձգում։

Համաշխարհային առևտուրը վերջին 80 տարիների ամենալուրջ ցնցումներին է ենթարկվում․ ԱՀԿ
Առևտրի համաշխարհային կազմակերպության գնահատմամբ՝ ԱՄՆ-ի կողմից մաքսատուրքերի սահմանումը և երկրների պատասխան քայլերը հանգեցրել են համաշխարհային առևտրի լուրջ ցնցումների։ Այնուամենայնիվ, ԱՀԿ-ն նշում է, որ համակարգը շարունակում է մնալ դիմացկուն։