Գործազրկության մակարդակը Հայաստանում․ ինչու չի ստացվում աշխատանք գտնել

Կառավարությունը նպատակ ունի գործազրկության մակարդակը նվազեցնել մինչև 10%-ից պակաս։

Հայաստանում գործազրկության մակարդակը 2025 թվականի երրորդ եռամսյակում կազմել է 11.8%՝ 2024 թվականի նույն ժամանակահատվածի 13.3%-ի համեմատ։ Այս մասին ԱԺ-ում հայտնել է էկոնոմիկայի նախարար Գևորգ Պապոյանը։

Ցուցանիշի նվազումը տեղի է ունենում զբաղվածության քաղաքականության վերանայման և աշխատաշուկայի ակտիվացման պայմաններում։

Կառավարությունը 2024 թվականի դեկտեմբերին հաստատել է զբաղվածության 2025–2031 թվականների ռազմավարությունը, որի հիմնական նպատակը գործազրկության մակարդակի նվազեցումն է։

Ռազմավարության շրջանակում արձանագրվել է, որ աշխատունակ բնակչության մի հատված չունի ժամանակակից աշխատաշուկայի պահանջներին համապատասխան հմտություններ, ինչը սահմանափակում է նրանց ներգրավվածությունը աշխատաշուկայում։

Թիրախային խմբեր են հանդիսանում մարզային քաղաքների բնակիչները, չսովորող և չաշխատող երիտասարդները, 30–39 տարեկան կանայք, ինչպես նաև սոցիալական նպաստառուները։

Կառավարությունը նպատակ ունի գործազրկության մակարդակը նվազեցնել մինչև 10%-ից պակաս։

Տվյալները ցույց են տալիս, որ գործազրկության նվազումը պայմանավորված է ինչպես տնտեսական ակտիվությամբ, այնպես էլ զբաղվածության քաղաքականության ուղղվածությամբ՝ աշխատուժի հմտությունների համապատասխանեցմանը։