2025-ին Հայաստանի օդանավակայանները սպասարկել են 5.7 մլն ուղևոր

Ցուցանիշը 7.5%-ով գերազանցել է 2024 թվականի արդյունքը։

2025 թվականին Հայաստանի «Զվարթնոց» և «Շիրակ» օդանավակայանները միասին սպասարկել են շուրջ 5.7 մլն ուղևոր։ Այս մասին ԱԺ-ում հայտնել է Տարածքային կառավարման և ենթակառուցվածքների նախարար Դավիթ Խուդաթյանը։

Նրա խոսքով՝ ցուցանիշը 7.5%-ով գերազանցել է 2024 թվականի արդյունքը։

Աճը տարբեր է եղել ըստ օդանավակայանների։ Երևանի «Զվարթնոց» օդանավակայանում աճը կազմել է 7%, իսկ Գյումրու «Շիրակ» օդանավակայանում՝ 32.4%։

Նախարարը նշել է, որ հատկապես Գյումրիում արձանագրված աճը պայմանավորված է պետական սուբսիդավորման ծրագրով, որի շրջանակում խթանվում են նոր չվերթների բացումները։

Մասնավորապես, 2025 թվականի հոկտեմբերից գործարկվել է «Wizz Air» ավիաընկերության Գյումրի–Լարնակա ուղղությունը։

Ընդհանուր առմամբ, 2025 թվականին դեպի և Հայաստանից իրականացվել են թռիչքներ 67 ուղղություններով, որոնք սպասարկել են 48 ավիաընկերություններ։

Տվյալները ցույց են տալիս, որ ավիացիոն ոլորտում աճը պայմանավորված է ինչպես պահանջարկի ավելացմամբ, այնպես էլ պետական խթանման մեխանիզմների կիրառմամբ։