Իրանն առաջարկում է նվազեցնել ուրանի հարստացումը՝ ԱՄՆ-ի հետ հնարավոր պայմանավորվածության շրջանակում

Իրանը չի ձգտում միջուկային զենքի ստեղծման, չի արտադրում և չի կուտակում նման զինատեսակներ։

Իրանը պատրաստ է նվազեցնել ուրանի հարստացման մակարդակը 60 տոկոսից մինչև 20 տոկոս՝ պայմանով, որ Միացյալ Նահանգները դրա դիմաց վճարում իրականացնի։ Այս մասին Al Mayadeen հեռուստաընկերությանը տված հարցազրույցում հայտարարել է Իրանի գերագույն առաջնորդի խորհրդական Ալի Շամխանին։ Տեղեկությունը փոխանցում է «Արմենպրես»-ը։

Շամխանիի խոսքով՝ Իրանի միջուկային ծրագիրը խաղաղ բնույթ է կրում, և բարձր մակարդակով հարստացումը չի ենթադրում միջուկային զենքի ստեղծում։ Նա նշել է, որ ուրանի հարստացման 60 տոկոս մակարդակը կարող է նվազեցվել մինչև 20 տոկոս, եթե դրա շուրջ առկա մտահոգությունները քննարկվեն համապատասխան փոխհատուցման պայմաններում։

Նրա ներկայացմամբ՝ մինչև 60 տոկոս հարստացված ուրանի առկայությունը դիտարկվում է որպես անվտանգության և բանակցային գործոն։ Ըստ Շամխանիի՝ այն նախ նախատեսված է Իրանի դեմ հնարավոր գործողություններին հակազդելու համար, ինչպես նաև միջազգային բանակցությունների ընթացքում դիրքավորման նպատակով։

Ալի Շամխանին հայտարարել է նաև, որ Իրանը մտադիր չէ հարստացված ուրանի պաշարները արտահանել երրորդ երկրներ՝ ԱՄՆ-ի հետ հնարավոր միջուկային համաձայնագրի շրջանակում։ Նա նշել է, որ պահեստավորված նյութերի երկրից դուրսբերման անհրաժեշտություն չի դիտարկվում։ Միաժամանակ, լրատվամիջոցը նշում է, որ որպես հնարավոր տարբերակ շրջանառվում է Ռուսաստանը, սակայն պաշտոնական Թեհրանը նման մտադրություն չի հայտնել։

Շամխանիի խոսքով՝ Իրանը չի ձգտում միջուկային զենքի ստեղծման, չի արտադրում և չի կուտակում նման զինատեսակներ։ Նա հավելել է, որ հարստացված ուրանի իրական քանակը ներկայում հստակ հայտնի չէ, քանի որ պաշարների մի մասը գտնվում է վնասված օբյեկտներում։ Դրանց դուրսբերման գործընթաց չի իրականացվել անվտանգության ռիսկերից ելնելով։

Նրա տեղեկացմամբ՝ բանակցություններ են ընթանում Ատոմային էներգիայի միջազգային գործակալության հետ՝ վնասված օբյեկտներ մուտք գործելու և պաշարների գնահատում իրականացնելու նպատակով՝ անվտանգության պայմանների պահպանմամբ։