2025-ին ԱՄՆ-ի առաջատար բանկերը բաժնետերերին վճարել են ռեկորդային՝ ավելի քան $140 մլրդ

Բանկերի ղեկավարությունը հայտարարել է, որ նախատեսում է պահպանել բաժնետերերին վճարումների բարձր մակարդակը նաև ընթացիկ տարում։

ԱՄՆ-ի առաջատար բանկերը 2025 թվականի ընթացքում բաժնետերերին վճարել են ավելի քան 140 միլիարդ դոլար՝ դիվիդենտների և սեփական բաժնետոմսերի հետգնման (buyback) միջոցով։ Այս ցուցանիշը դարձել է պատմական ռեկորդ՝ գերազանցելով նախորդ առավելագույն մակարդակը, որը գրանցվել էր 2019 թվականին։

Վճարումների աճը պայմանավորված է կապիտալի բավարարության պահանջների մեղմացմամբ և բանկերի կողմից Դաշնային պահուստային համակարգի սթրես-թեստերի հաջող հաղթահարմամբ, ինչի արդյունքում ֆինանսական հաստատությունները ստացել են ավելի մեծ ճկունություն կապիտալի բաշխման հարցում։

Մասնավորապես, JPMorgan Chase & Co.-ն 2025 թվականի ընթացքում ավելի քան 30 միլիարդ դոլարով հետ է գնել սեփական բաժնետոմսերը։ Citigroup Inc.-ը, իր հերթին, երրորդ եռամսյակում հնգապատկել է բաժնետոմսերի հետգնման ծավալը՝ նախորդ տարվա նույն ժամանակահատվածի համեմատ՝ սթրես-թեստերի դրական արդյունքներից հետո։

Բանկերի ղեկավարությունը հայտարարել է, որ նախատեսում է պահպանել բաժնետերերին վճարումների բարձր մակարդակը նաև ընթացիկ տարում։ Goldman Sachs Group-ի գլխավոր գործադիր տնօրեն Դևիդ Սոլոմոնը նշել է, որ բանկը կշարունակի «դինամիկ մոտեցում» ցուցաբերել բաժնետոմսերի հետգնման քաղաքականության մեջ՝ կախված շուկայական պայմաններից և կապիտալի դիրքից։

Վերլուծաբանների գնահատմամբ՝ դիվիդենտների և buyback-ների նման բարձր ծավալները վկայում են ԱՄՆ բանկային հատվածի ֆինանսական կայունության, շահութաբերության և բաժնետերերի եկամտաբերության վրա կենտրոնացած ռազմավարության մասին։