Մեծ Բրիտանիայում քննարկվում է X սոցիալական հարթակի հնարավոր փակումը Grok չատ-բոտի շուրջ սկանդալի ֆոնին

Խոսքը վերաբերում է օգտատերերի կողմից Grok-ի օգնությամբ կանանց և երեխաների պատկերների մանիպուլյացիայի դեպքերին:

Մեծ Բրիտանիայի իշխանությունները քննարկում են X սոցիալական հարթակի գործունեության սահմանափակման կամ փակման հնարավորությունը՝ Grok արհեստական բանականության չատ-բոտի միջոցով ստեղծվող պատկերների հետ կապված սկանդալի պատճառով։ Այս մասին հայտնում է The Daily Telegraph-ը՝ հղում կատարելով վարչապետ Քիր Սթարմերի գրասենյակի աղբյուրներին։

Պարբերականի փոխանցմամբ՝ վարչապետը դիմել է Ofcom մեդիա-կարգավորողին՝ խնդրելով ուսումնասիրել հարթակի նկատմամբ կիրառելի բոլոր իրավական տարբերակները։ Ըստ աղբյուրների՝ խոսքը վերաբերում է օգտատերերի կողմից Grok-ի օգնությամբ կանանց և երեխաների պատկերների մանիպուլյացիայի դեպքերին, ներառյալ՝ լուսանկարների մերկացման նպատակով արհեստական բանականության կիրառումը։

Նշվում է, որ նման կերպով ստեղծված պատկերների թվում հայտնվել են նաև Ուելսի արքայադստեր, կառավարության նախարարների, խորհրդարանի անդամների և հանրահայտ այլ անձանց պատկերներ։ Բրիտանական ինտերնետ վերահսկող կազմակերպության տվյալներով՝ դարքնետում հայտնաբերվել են նաև նյութեր, որոնք պարունակում են երեխաների հանդեպ սեռական բռնության պատկերներ։

The Daily Telegraph-ի տեղեկացմամբ՝ վարչապետի գրասենյակը այս հարցով ուղիղ կապ է հաստատել X հարթակի հետ, սակայն պատասխան ստանալու մասին տեղեկություն առկա չէ։

Իր հերթին՝ X-ի սեփականատեր Իլոն Մասկը հայտարարել է, որ Grok չատ-բոտի միջոցով անօրինական բովանդակություն ստեղծողները կենթարկվեն նույն իրավական հետևանքներին, ինչ անօրինական բովանդակություն տարածող օգտատերերը։