Տարեսկզբից ի վեր ԱՄՆ պետդեպը տարբեր կատեգորիաների 85 հազար վիզա է չեղարկել

Վիզաներ են հետ կանչվել նաև որոշ օտարերկրացիներից, ովքեր տոնել են ամերիկացի պահպանողական ակտիվիստ Չարլի Քըրքի սպանությունը։

ԱՄՆ Պետդեպարտամենտը 2025 թվականի հունվարից ի վեր չեղարկել է տարբեր կատեգորիաների 85,000 վիզա, ինչը կրկնակի անգամ ավելի է, քան նախորդ տարվա ցուցանիշը։ Այս մասին հաղորդում է CNN-ը՝ հղում անելով գերատեսչության մամուլի խոսնակին։

Ըստ նրա տվյալների՝ վիզաների գրեթե 50%-ը հետ է կանչվել այն օտարերկրացիներից, որոնք կատարել են այնպիսի իրավախախտումներ, ինչպիսիք են ոչ սթափ վիճակում մեքենա վարելը, հարձակումները և գողությունները։ Եվս ութ հազար վիզա չեղարկվել է ուսանողների մոտ։ CNN-ը նշում է, որ վիզաներ են հետ կանչվել նաև որոշ օտարերկրացիներից, ովքեր տոնել են ամերիկացի պահպանողական ակտիվիստ Չարլի Քըրքի սպանությունը։

Պետդեպարտամենտը իրավունք ունի չեղարկել վիզաները երկրում թույլատրելի գտնվելու ժամկետը գերազանցելու, վիզա ունեցողի կողմից հանցավոր գործունեության մեջ ներգրավված լինելու, հասարակական անվտանգությանը սպառնալու, ինչպես նաև ահաբեկչական կազմակերպության գործունեությանը մասնակցելու կամ աջակցելու պատճառներով։