Եգիպտոսը մինչև 30%-ով բարձրացրել է վառելիքի գները

Նախորդ օրերին նավթի համաշխարհային գները կարճ ժամանակով գերազանցել էին մեկ բարելի դիմաց 119 դոլարը։

Եգիպտոսն այս երեքշաբթի բարձրացրել է վառելիքի ներքին գները՝ որոշ տեսակների դեպքում մինչև 30%-ով։ Ինչպես հայտնում է AFP-ն, իշխանությունները քայլը հիմնավորել են համաշխարհային էներգետիկ «բացառիկ» ճնշմամբ՝ պայմանավորված Մերձավոր Արևելքում ընթացող պատերազմով։

Նավթի նախարարության հայտարարության համաձայն՝ գների վերանայումը վերաբերում է բենզինին, դիզելային վառելիքին և ավտոմեքենաների համար նախատեսված բնական գազին։ Գերատեսչությունը նշել է, որ մատակարարման շղթաների խափանումները, ռիսկերի մակարդակի բարձրացումը, ինչպես նաև ծովային փոխադրումների և ապահովագրության ծախսերի աճը հանգեցրել են նավթամթերքի գների զգալի բարձրացման։

Գների փոփոխությունները

  • Դիզելային վառելիքը թանկացել է 17.1%-ով՝ 17.50-ից հասնելով 20.50 եգիպտական ֆունտի մեկ լիտրի համար։

  • 80 օկտանային բենզինը թանկացել է 16.9%-ով՝ հասնելով 20.75 ֆունտի։

  • 92 օկտանային բենզինը՝ 15.6%-ով՝ կազմելով 22.25 ֆունտ։

  • 95 օկտանային բենզինը՝ 14.3%-ով՝ հասնելով 24 ֆունտի։

  • Ավտոմեքենաների համար նախատեսված բնական գազը թանկացել է 30%-ով՝ մեկ խորանարդ մետրի գինը հասցնելով 13 ֆունտի։

Նշվում է, որ նախորդ օրերին նավթի համաշխարհային գները կարճ ժամանակով գերազանցել էին մեկ բարելի դիմաց 119 դոլարը, սակայն հետագայում նվազել էին մինչև մոտ 84 դոլար։

ԱՄՀ ծրագրի շրջանակում

Վերջին երկու տարվա ընթացքում Եգիպտոսը չորս անգամ բարձրացրել է վառելիքի գները՝ Արժույթի միջազգային հիմնադրամի 8 միլիարդ դոլար արժողությամբ վարկային ծրագրի շրջանակում։ Ենթադրվում է, որ հոկտեմբերին նախատեսված մինչև 13% թանկացումը կարող է լինել ծրագրի վերջին փուլը։