Հայաստանում կձևավորվեն երեք նոր խոշորացված համայնքներ

Օրենսդրական նախաձեռնությունը նպատակ ունի օպտիմալացնել համայնքների կառավարման համակարգը և ռեսուրսների բաշխումը։

Ազգային ժողովի տարածքային կառավարման, տեղական ինքնակառավարման, գյուղատնտեսության և շրջակա միջավայրի պաշտպանության հարցերով մշտական հանձնաժողովն ապրիլի 30-ի նիստում դրական եզրակացություն է տվել «ՀՀ վարչատարածքային բաժանման մասին» օրենքում փոփոխություններ կատարելու նախագծին։ Տարածքային կառավարման և ենթակառուցվածքների փոխնախարար Դավիթ Խուդաթյանի ներկայացմամբ՝ նախատեսվում է 9 համայնքի և 80 բնակավայրի միավորման արդյունքում ձևավորել 3 նոր խոշորացված միավոր։

Ըստ նախագծի՝ փոփոխությունները կիրականացվեն հետևյալ մարզերում.

• Լոռի. Ստեփանավան, Գյուլագարակ և Լոռի Բերդ համայնքների միավորում (20 բնակավայր)։

• Սյունիք. Գորիս, Տաթև և Տեղ համայնքների միավորում (28 բնակավայր)։

• Վայոց ձոր. Եղեգնաձոր, Արենի և Եղեգիս համայնքների միավորում (32 բնակավայր)։

Օրենսդրական նախաձեռնությունը նպատակ ունի օպտիմալացնել համայնքների կառավարման համակարգը և ռեսուրսների բաշխումը։ Հանձնաժողովի դրական եզրակացությունից հետո նախագիծը կընդգրկվի խորհրդարանի լիագումար նիստերի օրակարգում։