Տնտեսական հանցագործությունների պատկերը Հայաստանում․ Դատախազությունը ներկայացրել է 2025-ի տվյալները

Պետությանը պատճառված վնասի վերականգնումներ են կատարվել մի շարք քրեական վարույթների շրջանակում։

Հայաստանի Հանրապետության գլխավոր դատախազ Աննա Վարդապետյանի գլխավորությամբ 2026 թվականի մարտի 7-ին տեղի է ունեցել Դատախազության կոլեգիայի ընդլայնված նիստ, որի ընթացքում ամփոփվել են Դատախազության 2025 թվականի աշխատանքները։

Դատախազությունից հայտնում են, որ գլխավոր դատախազի տեղակալ Արամ Արամյանը ներկայացրել է տնտեսական գործունեության, պետական իշխանության և բնակչության առողջության դեմ ուղղված հանցագործությունների գործերով վարչությունների կատարած աշխատանքները։

Տնտեսական հանցագործություններ․ վերականգնվել է 30.3 մլրդ դրամ

Արամ Արամյանի խոսքով՝ 2025 թվականին տնտեսական գործունեության դեմ ուղղված հանցագործությունների գործերով վարչության հսկողությամբ քննվող քրեական վարույթներով վերականգնվել է 30 միլիարդ 341 միլիոն 581 հազար դրամի վնաս։ Ավարտված քրեական վարույթներով վերականգնվել է 15 միլիարդ 463 միլիոն 560 հազար դրամ։

Գլխավոր դատախազի տեղակալի տեղեկացմամբ՝ պետությանը պատճառված վնասի վերականգնումներ են կատարվել մի շարք քրեական վարույթների շրջանակում, այդ թվում՝ նախկին պաշտոնատար անձանց և պատգամավորների հետ առնչվող գործերով։

Պաշտոնատար անձանց գործունեությանը միջամտելու դեպքերի նվազում

Ըստ ներկայացված տվյալների՝ 2025 թվականին նվազել են պաշտոնատար անձանց օրինական ծառայողական կամ քաղաքական գործունեությանը միջամտելու դեպքերը։

• 2023 թվականին արձանագրվել է 141 դեպք,

• 2024 թվականին՝ 111 դեպք,

• 2025 թվականին՝ 87 դեպք։

Նշվել է, որ 2024 և 2025 թվականներին բացահայտման մակարդակը կազմել է 100 տոկոս։

Թմրամիջոցների ապօրինի շրջանառություն

Բնակչության առողջության դեմ ուղղված հանցագործությունների գործերով վարչության կողմից 2025 թվականին դատարան է ուղարկվել համացանցի և հեռահաղորդակցման համակարգերի միջոցով թմրամիջոցների իրացման համար մեղադրվող 24 անձի վերաբերյալ 11 քրեական վարույթ։

Այս վարույթներով արձանագրված ընդհանուր դրամաշրջանառությունը կազմել է շուրջ 5 միլիարդ 108 միլիոն 634 հազար դրամ։