Կթվայնացվեն քաղաքացիություն ստանալու և քաղաքացիությունը դադարեցնելու գործընթացներում մատուցվող ծառայությունները

Կարգավորվել են նաև հերթագրման և լիազոր մարմին այցելելու մեխանիզմները։

ՀՀ կառավարությունը սահմանել է Քաղաքացիության գործերի կառավարման էլեկտրոնային տեղեկատվական համակարգի նկարագիրը և աշխատակարգը՝ էականորեն վերափոխելով ՀՀ քաղաքացիություն ստանալու կամ այն դադարեցնելու գործընթացները։

Նոր կարգավորմամբ հաստատվել է համակարգին հասանելիություն ունեցող մարմինների ցանկը, ՀՀ քաղաքացիություն ստանալու կամ ՀՀ քաղաքացիությունը դադարեցնելու համար անհրաժեշտ փաստաթղթերի ամբողջական ցանկը, դրանց ներկայացման, քննարկման և էլեկտրոնային հայտերի վարման կարգը։ Սահմանվել են նաև դիմումը անձամբ ներկայացնելու համար հերթագրվելու, իրավասու մարմիններին հարցումներ ուղարկելու, եզրակացություններ և ծանուցումներ ստանալու մեխանիզմներն ու ժամկետները։

Կարգավորումը ներառում է նաև ազգությամբ հայ լինելը հաստատող մկրտության մասին փաստաթուղթ տրամադրող եկեղեցական կառույցների ցանկը, ՀՀ քաղաքացիություն ստացող անձի երդման արարողակարգը, ինչպես նաև քաղաքացիության հարցերով միջգերատեսչական հանձնաժողովի կազմավորման և գործունեության կարգը։

Նախատեսվել է քաղաքացիություն հայցող կամ քաղաքացիությունը դադարեցնել ցանկացող անձի քայլերի հստակ հաջորդականություն՝ սկսած էլեկտրոնային հայտի ներկայացումից մինչև վարույթի ավարտը։ Նոր համակարգում ներդրվել է նաև էլեկտրոնային հայտի շտկման հնարավորություն, ինչը թույլ է տալիս դիմորդներին նախապես հավաքագրել անհրաժեշտ փաստաթղթերը և անհրաժեշտության դեպքում կատարել ուղղումներ՝ մինչև հայտի վերջնական ներկայացումը։

Կարգավորվել են նաև հերթագրման և լիազոր մարմին այցելելու մեխանիզմները, ինչը նպատակ ունի բեռնաթափել հերթերը և ապահովել քաղաքացիների առավել արագ ու հարմար սպասարկում։

Կառավարության գնահատմամբ՝ այս փոփոխությունների արդյունքում քաղաքացիություն ստանալու և քաղաքացիությունը դադարեցնելու գործընթացները կթվայնացվեն ամբողջությամբ։ Դա թույլ կտա վարույթն իրականացնել էլեկտրոնային եղանակով, բարձրացնել գործընթացների արդյունավետությունը, խնայել ֆինանսական և մարդկային ռեսուրսներ, բարելավել ծառայությունների որակն ու հասանելիությունը և էականորեն պարզեցնել գործող ընթացակարգերը։