Ավստրալիայում ավելի քան 100 հազար տուն մնացել է առանց էլեկտրականության՝ անբնական շոգի պայմաններում

Ուոլփուպ քաղաքում ջերմաստիճանը հասել է 48.9 աստիճանի։

Ավստրալիայի հարավ-արևելքում առնվազն 106 հազար տուն մնացել է առանց էլեկտրականության՝ ծայրահեղ շոգի պայմաններում։ Այդ մասին հայտնել է Վիկտորիա նահանգի էներգետիկայի նախարար Լիլի Դ’Ամբրոզիոն։

Նրա փոխանցմամբ՝ ռեկորդային բարձր ջերմաստիճանների պայմաններում նահանգում արձանագրվել է էլեկտրաէներգիայի սպառման առավելագույն ցուցանիշը վերջին 17 տարվա ընթացքում։ Ժամը 20:30-ի դրությամբ բաշխիչ ցանցում գրանցվել է շուրջ 106 հազար խափանում։

Նախարարը նշել է, որ անջատումները պայմանավորված են մի քանի գործոններով, այդ թվում՝ բարձր ջերմաստիճանով, անտառային հրդեհների հետևանքով վնասված էլեկտրական սարքավորումներով, սյուներին և լարերին ընկած ծառերով, ինչպես նաև էլեկտրասարքավորումների գերտաքացմամբ։ Տեղում ներգրավվել են լրացուցիչ վերականգնողական բրիգադներ՝ հոսանքազրկումները հնարավորինս արագ վերացնելու համար։

The Age պարբերականի տվյալներով՝ անջատումների մեծ մասը գրանցվել է AusNet էներգամատակարարի սպասարկման գոտում, որտեղ ավելի քան 40 հազար բաժանորդ մնացել է առանց էլեկտրականության։ Պարբերականը նաև հայտնում է, որ տարածաշրջանում գործող բոլոր էներգամատակարարները արձանագրել են խափանումներ՝ շոգից պայմանավորված սպառման կտրուկ աճի պատճառով։

Անբնական շոգը ազդեցություն է ունեցել նաև հասարակական միջոցառումների վրա։ Ավելի վաղ Մելբուռնում փոխվել էր Ավստրալիայի բաց թենիսի առաջնության (Australian Open) խաղերի ժամանակացույցը։ +38 աստիճանից բարձր ջերմաստիճանի պայմաններում դադարեցվել էին բացօթյա կորտերի խաղերը, իսկ Rod Laver Arena-ի և Margaret Court Arena-ի տանիքները փակվել էին։

Ավստրալիայի պետական օդերևութաբանական ծառայության տվյալներով՝ Վիկտորիա նահանգում գրանցվել են ռեկորդային ջերմաստիճաններ։ Ուոլփուպ քաղաքում ջերմաստիճանը հասել է 48.9 աստիճանի, Միլդուրայում՝ 48.6-ի, իսկ Լոնգերենոնգում՝ 48.1-ի։

Ջերմաստիճանային ռեկորդներ են արձանագրվել նաև Հարավային Ավստրալիայում։ Ռենմարկ քաղաքում օդի ջերմաստիճանը հասել է 49.6 աստիճանի, Լոքսթոնում՝ 48.2-ի։

Օդերևութաբանների կանխատեսմամբ՝ Ավստրալիայի հարավ-արևելյան և կենտրոնական շրջաններում անբնական շոգ և չոր եղանակը կպահպանվի մինչև շաբաթվա վերջ։ Որոշ շրջաններում ջերմաստիճանը կարող է հասնել 49 աստիճանի, իսկ Վիկտորիայի մի շարք հատվածներում սահմանվել է կրակ վառելու և անտառ այցելելու լիակատար արգելք՝ անտառային հրդեհների բարձր ռիսկի պատճառով։