Չենք հրաժարվի վրեժխնդրությունից. հրապարակվել է Իրանի առաջնորդի առաջին ուղերձը

Իրանական լրատվամիջոցներով տարածվել է երկրի նոր գերագույն հոգևոր առաջնորդ Մոջտաբա Խամենեիի առաջին ուղերձը։

Նա ընդգծել է, որ Իրանը վրեժխնդիր կլինի նահատակների համար։

«Մենք Ձեզ հետ ուխտ ենք կնքում՝ ամեն գնով բարձրացնել վրեժխնդրության դրոշը, որը ճշմարտության ճակատի գլխավոր դրոշն է։ Մենք չենք հրաժարվի նահատակների արյան վրեժխնդրությունից»,- նշված է ուղերձում։

Խամենեին անդրադարձել է փոխհատուցում ստանալու անհրաժեշտությանը.

«Ամեն դեպքում մենք փոխհատուցում կստանանք թշնամուց։ Մենք կվերցնենք նրանց ունեցվածքի այն մասը, որքան կորոշենք։ Եթե դա հնարավոր չլինի՝ կոչնչացնենք թշնամու ունեցվածքի նույնքան մասը»։

Ուղերձում ընդգծվում է, որ Իրանը 15 հարևան երկիր ունի և բոլորի հետ ձգտում է ջերմ ու կառուցողական հարաբերությունների։

«Սակայն թշնամին տարիներ շարունակ որոշ երկրներում ստեղծել է ռազմական և ֆինանսական բազաներ՝ տարածաշրջանում իր տիրապետումն ապահովելու համար։ Վերջին հարձակման ժամանակ որոշ ռազմական բազաներ օգտագործվել են, և ինչպես նախապես զգուշացրել էինք՝ առանց այդ երկրներին հարձակվելու՝ մենք խոցել ենք միայն այդ բազաները։ Այսուհետ ևս ստիպված կլինենք շարունակել այդ գործը, թեև դեռևս հավատում ենք հարևանների հետ բարեկամության անհրաժեշտությանը»։

Խամենեին նաև հավաստիացրել է, որ Հորմուզի նեղուցը պետք է փակ մնա։