Հայաստանը վիզաների ազատականացման գործողությունների ծրագիրն իրականացնում է արդյունավետ. ԵՄ հանձնակատար

Վարչապետը ողջունել է այցը և կարևորել Եվրոպական միության հետ համագործակցության հետևողական զարգացումը։

Վարչապետ Նիկոլ Փաշինյանն ընդունել է ԵՄ ներքին գործերի և միգրացիայի հարցերով հանձնակատար Մագնուս Բրուններին։

Վարչապետը ողջունել է այցը և կարևորել Եվրոպական միության հետ համագործակցության հետևողական զարգացումը։ Նրա խոսքով՝ ԵՄ շարունակական աջակցությունը կարևոր դեր ունի Հայաստանում ժողովրդավարական բարեփոխումների արդյունավետ իրականացման գործում։

Փաշինյանն ընդգծել է, որ ՀՀ կառավարության նպատակն է տարբեր ոլորտներում ներդնել ԵՄ չափանիշներին համապատասխան ստանդարտներ։ Նա նաև գոհունակություն է հայտնել ՀՀ–ԵՄ վիզաների ազատականացման ուղղությամբ իրականացվող աշխատանքներից՝ նշելով, որ այն կարևոր քայլ կլինի երկկողմ հարաբերությունների խորացման համար։

Մագնուս Բրունները նշել է, որ Հայաստանը վիզաների ազատականացման գործողությունների ծրագիրն իրականացնում է հաջողությամբ և արդյունավետ։ Նա հույս է հայտնել, որ Հայաստանի հետևողական քայլերը կհանգեցնեն սպասված արդյունքին և վերահաստատել է ԵՄ պատրաստակամությունը՝ շարունակելու աջակցությունը բարեփոխումների առաջմղման հարցում։

Կողմերը նաև քննարկել են ՀՀ–ԵՄ փոխգործակցության օրակարգային հարցեր և անդրադարձել տարածաշրջանային նշանակության թեմաների։