Մարտի 12-ի բիզնես լուրերը

ՏԵՂԱԿԱՆ ԼՈՒՐԵՐ

Պետական աշխատողները կրկին լրացուցիչ կվարձատրվեն

Կառավարությունը որոշել է պետական աշխատողներին տրամադրել լրացուցիչ վարձատրություն՝ գնահատելով 2025 թվականի երկրորդ կիսամյակի աշխատանքի արդյունքները։ Վարչապետ Նիկոլ Փաշինյանը նշել է, որ անհրաժեշտ է վերանայել նաև տեղական ինքնակառավարման մարմիններում լրացուցիչ վարձատրության հարցը։

Սննդամթերքը Հայաստանում շարունակում է թանկանալ

2026 թվականի հունվարին սպառողական գների ինդեքսը 2025 թվականի նույն ժամանակահատվածի համեմատ աճել է 4.1%-ով, իսկ 2025 թվականի դեկտեմբերի համեմատ՝ 2.5%-ով։ Վիճակագրական կոմիտեի տվյալներով՝ գնաճի հիմնական պատճառը սննդամթերքի շուկայի թանկացումն է։

Հայկական և վրացական էներգահամակարգերը կմիանան

Հայաստան-Վրաստան էլեկտրաէներգետիկ կապի ծրագրով նախատեսվում է փոխանակման հզորությունը 200 ՄՎտ-ից բարձրացնել նախ 350 ՄՎտ-ի, իսկ հետագայում՝ մինչև 1050 ՄՎտ։ Ծրագրի ընդհանուր բյուջեն կազմում է 188.75 մլն եվրո։

«Ակադեմիական քաղաք» ծրագրի համար կգնվի խորհրդատվություն

Ծրագրի շրջանակում խորհրդատվական ծառայություններ կգնվեն մեկ անձից գնման ընթացակարգով։ Արվեստի կլաստերի համար համագործակցություն է նախատեսվում Լոնդոնի արվեստների համալսարանի հետ, իսկ երաժշտական բաղադրիչի համար՝ Շոտլանդիայի թագավորական կոնսերվատորիայի հետ։

Փոփոխություններ՝ վարորդական վկայական ստանալու գործընթացում

Վարորդական վկայական ստանալու գործընթացում հերթերը նվազեցնելու նպատակով մարտ ամսվա բոլոր շաբաթ օրերը հայտարարվել են աշխատանքային հաշվառման-քննական ստորաբաժանումներում։ Ներդրվել են նաև նոր տեխնիկական լուծումներ հերթագրման համակարգում։

ՄԻՋԱԶԳԱՅԻՆ ԼՈՒՐԵՐ

Չերչիլի պատկերը կարող է անհետանալ բրիտանական թղթադրամներից

Անգլիայի բանկը քննարկում է նոր թղթադրամների վրա պատմական դեմքերի փոխարեն բրիտանական վայրի կենդանիների պատկերների օգտագործումը։ Հնարավոր տարբերակների թվում են ոզնիները և գորշուկները։

Միջազգային բանկերը սահմանափակում են աշխատանքը Դուբայում և Կատարում

Տարածաշրջանում լարվածության պատճառով խոշոր բանկերը՝ Citi, Standard Chartered և HSBC, սահմանափակում են գրասենյակների աշխատանքը Դուբայում և Կատարում կամ աշխատակիցներին տեղափոխում հեռավար աշխատանքի։

Չինաստանը խստացրել է վառելիքի արտահանման սահմանափակումները

Չինաստանի իշխանությունները Մերձավոր Արևելքում լարվածության ֆոնին խոշոր նավթավերամշակող ընկերություններին կոչ են արել չկնքել նոր արտահանման պայմանագրեր բենզինի և դիզելային վառելիքի համար։

ԵԿԲ-ն փորձում է կանխել նոր գնաճային շոկը եվրագոտում

Եվրոպական կենտրոնական բանկը հայտարարել է, որ մտադիր է թույլ չտալ Մերձավոր Արևելքի հակամարտության հետևանքով եվրագոտում նոր գնաճային շոկի առաջացում։ Բանկի գնահատմամբ՝ եվրոպական տնտեսությունն այժմ ավելի դիմացկուն է նման ցնցումների նկատմամբ։