Հայաստանի արտաքին առևտուրը՝ 2025-ին․ կտրուկ անկում և շուկաների անհավասար զարգացում

Հայաստանից արտահանումը նվազել է։

Հայաստանի արտաքին առևտրաշրջանառությունը 2025 թվականի հունվար–նոյեմբերին կազմել է 18 մլրդ 908 մլն 366.3 հազար ԱՄՆ դոլար՝ 2024 թվականի նույն ժամանակահատվածի համեմատ նվազելով 33.2 տոկոսով։ Այդ մասին տեղեկացնում է ՀՀ վիճակագրական կոմիտեն։

Նույն ժամանակահատվածում Հայաստանից արտահանման ծավալները նվազել են 40.6 տոկոսով՝ կազմելով 7 մլրդ 349 մլն 13.6 հազար դոլար։ Ներմուծման ծավալները նվազել են 27.4 տոկոսով և կազմել 11 մլրդ 559 մլն 352.7 հազար դոլար։

Արտահանման հիմնական ուղղություններով առաջատար են մնացել Ռուսաստանը, Արաբական Միացյալ Էմիրությունները և Չինաստանը։

Ռուսաստան արտահանումը 2025 թվականի 11 ամսում կազմել է 2 մլրդ 725 մլն 215.9 հազար դոլար՝ նախորդ տարվա նույն ժամանակահատվածի համեմատ նվազելով 9 տոկոսով։

Արաբական Միացյալ Էմիրություններ արտահանման ծավալը կազմել է 1 մլրդ 698 մլն 159 հազար դոլար, սակայն ցուցանիշը նվազել է 66.2 տոկոսով։

Չինաստան արտահանումը կազմել է 648 մլն 541.7 հազար դոլար՝ նվազելով 38.1 տոկոսով։

Տարածաշրջանային ուղղություններով՝ դեպի ԵԱՏՄ երկրներ արտահանումը նվազել է 7.2 տոկոսով՝ կազմելով 2 մլրդ 948 մլն 125.5 հազար դոլար։ Միաժամանակ, դեպի ԵՄ երկրներ արտահանումն աճել է 7.6 տոկոսով՝ հասնելով 593 մլն 641.6 հազար դոլարի։

ԵՄ երկրների ներսում արձանագրվել են տարբեր միտումներ։ Նիդեռլանդներ արտահանումը կազմել է 127 մլն 536.6 հազար դոլար՝ աճելով 11.4 տոկոսով։ Գերմանիա արտահանումն աճել է 74.3 տոկոսով՝ հասնելով 101 մլն 620.8 հազար դոլարի։ Բելգիա արտահանումն աճել է 15.9 տոկոսով՝ կազմելով 127 մլն 121.2 հազար դոլար։

Միևնույն ժամանակ, Ֆրանսիա արտահանումը նվազել է 29.5 տոկոսով՝ կազմելով 5 մլն 895.2 հազար դոլար, իսկ Իտալիա արտահանումը նվազել է 1.3 տոկոսով՝ կազմելով 60 մլն 428.5 հազար դոլար։

Տվյալները ցույց են տալիս, որ 2025 թվականին Հայաստանի արտաքին առևտրում արձանագրվել է ընդհանուր նվազում՝ արտահանման շուկաների միջև հակադիր դինամիկայով։