2025-ին ՀՀ քաղաքացիների մուտքերի և ելքերի տարբերությունը դարձել է դրական․ ՆԳՆ հաշվետվություն

Հաշվետվության շրջանակում ներկայացվել են նաև աղետների ռիսկի կառավարման ոլորտում իրականացված բարեփոխումները։

ՆԳՆ 2025 թվականի գործունեության հաշվետվության քննարկման ընթացքում ներկայացվել է, որ 2025 թվականին Հայաստանի Հանրապետության քաղաքացիների կողմից իրականացված մուտքերի և ելքերի տարբերությունը եղել է դրական՝ կազմելով 8,660։ Քովիդ համավարակով պայմանավորված 2020 թվականի բացառությունը չհաշված՝ սա առաջին դեպքն է, երբ ցուցանիշը դրական է։

Քննարկմանը ներկա է եղել ՀՀ վարչապետ Նիկոլ Փաշինյանը։ Ներկայացված տվյալների համաձայն՝ փոփոխությունը դիտարկվում է որպես միգրացիոն միտումների իրական փոփոխություն։

Միաժամանակ արձանագրվել է սահմանահատումների ընդհանուր դրական սալդո՝ մոտ +30,500։ Նշվել է, որ այս ցուցանիշը վկայում է միգրացիոն նոր իրավիճակի մասին, որի պայմաններում Հայաստանը դիտարկվում է ոչ միայն որպես տարանցիկ երկիր, այլև որպես մուտքի ուղղություն։

Հաշվետվության շրջանակում ներկայացվել են նաև աղետների ռիսկի կառավարման ոլորտում իրականացված օրենսդրական, ինստիտուցիոնալ և տեխնիկական բարեփոխումները։ Դրանց թվում է Փրկարար ծառայության զարգացման հաստատված հայեցակարգը, որը նախատեսում է նոր և օպտիմալ կառուցվածքային մոդելի ձևավորում՝ կառավարման արդյունավետության, արձագանքման արագության և ռեսուրսների նպատակային օգտագործման բարձրացման նպատակով։

Ներկայացվել են նաև Փրկարար ծառայության ենթակառուցվածքային ծրագրերը՝ Ստեփանավանում մոդուլային շենքի բացումը, Սևանի ջրափրկարարական կայանի կառուցումը, Եղեգնաձորի հրշեջ-փրկարարական ջոկատի մասնաշենքի գործարկումը։ Հաղորդվել է նոր տրանսպորտային միջոցների և նոր համազգեստի ձեռքբերման մասին։