433 հայ մասնագետ է վերապատրաստվել ITEC ծրագրով․ Հայաստան–Հնդկաստան համագործակցությունը շարունակվում է

Հայաստանի Հանրապետությունը բարձր է գնահատում Հնդկաստանի Հանրապետության հետ ձևավորված բարեկամական և փոխշահավետ հարաբերությունները։

ԿԳՄՍ նախարարի տեղակալ Արթուր Մարտիրոսյանը և ՀՀ-ում Հնդկաստանի Հանրապետության արտակարգ և լիազոր դեսպան Նիլակշի Սահա Սինհան մասնակցել են Հնդկաստանի տեխնիկական և տնտեսական համագործակցության (ITEC) ծրագրին նվիրված միջոցառմանը։

Արթուր Մարտիրոսյանը ողջունել է ITEC ծրագրի շրջանավարտներին՝ ընդգծելով, որ նրանք իրենց գիտելիքով և փորձով նպաստում են ՀՀ տարբեր ոլորտների զարգացմանը։

«Հայաստանի Հանրապետությունը բարձր է գնահատում Հնդկաստանի Հանրապետության հետ ձևավորված բարեկամական և փոխշահավետ հարաբերությունները։ ITEC ծրագիրը համագործակցության կարևոր ուղղություններից է, որը տարիների ընթացքում դարձել է մասնագիտական կարողությունների զարգացման արդյունավետ հարթակ»,- նշել է նա։

Փոխնախարարը կարևորել է նաև այն փաստը, որ նույնիսկ Covid-19 համավարակի ընթացքում ծրագիրը շարունակել է գործել՝ թվային հարթակների միջոցով ապահովելով առցանց դասընթացներ հազարավոր մասնագետների համար։

ՀՀ քաղաքացիները ITEC ծրագրին մասնակցում են 1999 թվականից։ Այս տարիների ընթացքում ծրագրի շրջանակում վերապատրաստվել է 433 մասնագետ՝ պետական կառավարման, տեղեկատվական տեխնոլոգիաների, կրթության, առողջապահության և այլ ոլորտներից։

2025–2026 թվականներին ծրագրին մասնակցել է 39, իսկ 2024–2025 թվականներին՝ 38 հայ մասնագետ։

ITEC ծրագրի շրջանակում Հնդկաստանը աշխարհի տարբեր երկրներից մասնագետներին տրամադրում է կարողությունների զարգացման դասընթացներ և կրթաթոշակներ՝ նպաստելով ինչպես մասնագիտական զարգացմանը, այնպես էլ մշակութային փոխճանաչողությանը։