Հարվածներ՝ Դուբայի միջազգային ֆինանսական կենտրոնին

Դուբայի կենտրոնում գտնվող շենքը փոքր վնասներ է կրել պայթյունի հետևանքով, հայտնել է էմիրության իշխանությունների մամուլի ծառայությունը։

Պաշտոնական հաղորդագրության համաձայն՝ պայթյունը վերագրվում է «հաջողությամբ խոցված օբյեկտից» ընկնող բեկորներին։ Իշխանությունները նշել են, որ միջադեպի հետևանքով զոհեր չկան։

Դուբայի հակաօդային պաշտպանության համակարգի կողմից ոչնչացված օբյեկտի տեսակը չի բացահայտվել։ ԱՄԷ պաշտպանության նախարարությունը դեռևս չի մեկնաբանել միջադեպը։

Ավելի վաղ լրատվամիջոցները հայտնել էին, որ Դուբայի DIFC շենքի մոտ պայթել է իրանական անօդաչու թռչող սարք։ Տարածքում նկատվել է ծուխ, կոտրվել են պատուհաններ։ Տեղեկություններ էին շրջանառվում նաև, որ անօդաչու սարքը հարվածել է Ջումեյրա լողափի հատվածում, որտեղ գրանցվել են պայթյուններ։

Պաշտոնական աղբյուրները միջադեպի հանգամանքների վերաբերյալ մանրամասներ դեռ չեն հրապարակել։