15,000 էլեկտրական շարժիչով տրանսպորտային միջոցներ 2026 թվականի ընթացքում կազատվեն ներմուծման մաքսատուրքից

Որոշումն ուժի մեջ կմտնի 2026 թվականի հունվարի 22-ից:

Պետական եկամուտների կոմիտեն տեղեկացնում է, որ ՀՀ կառավարության 2025 թվականի դեկտեմբերի 25-ի N 1971-Ն որոշմամբ հաստատվել է Հայաստանի Հանրապետությանը հատկացված՝ մաքսատուրքի վճարումից ազատմամբ 15 000 էլեկտրական շարժիչով տրանսպորտային միջոցների ներմուծման ընթացակարգը։

Որոշումը հիմնված է Եվրասիական տնտեսական հանձնաժողովի խորհրդի 2025 թվականի դեկտեմբերի 5-ի N 111 որոշման վրա։

Կոմիտեի հաղորդմամբ՝ 2026 թվականի ընթացքում ՀՀ տարածք ներմուծվող, ԵԱՏՄ ԱՏԳ ԱԱ 8703 80 000 3 և 8703 80 000 5 ծածկագրերին դասվող, 2023 թվականի դեկտեմբերի 31-ից հետո թողարկված էլեկտրաշարժիչով ավտոմեքենաների ընդհանուր քանակից՝

• 3000 ավտոմեքենա կհատկացվի բացառապես այն սուբյեկտներին, որոնք ներմուծում են իրականացում ավտոարտադրողի հետ կնքված դիլերական-դիստրիբյուտորական պայմանագրի շրջանակում,

• 12 000 ավտոմեքենա կհատկացվի այլ սուբյեկտներին, այդ թվում՝ ֆիզիկական անձանց։

Միաժամանակ, նախատեսվում է, որ նշված 3000 միավորի չսպառման դեպքում մնացորդը կվերաբաշխվի այլ սուբյեկտների միջև։

Որոշումն ուժի մեջ կմտնի 2026 թվականի հունվարի 22-ից և կկիրառվի նույն օրվանից մաքսային ձևակերպված էլեկտրական շարժիչով տրանսպորտային միջոցների նկատմամբ։