Ֆրանսիայում խորհրդարանական ընտրությունների անսպասելի արդյունքները

Ֆրանսիայում ավարտվել է Ազգային ժողովի ընտրությունների երկրորդ փուլը, և նախնական արդյունքները բավականին տարբերվում են առաջին փուլի արդյունքներից։ Ըստ Ifop-ի հարցումների տվյալների, ձախ «Նոր ժողովրդական ճակատ» դաշինքն առաջին տեղում է և կարող է ստանալ 180-215 մանդատ։ Երկրորդ տեղում է նախագահ Էմանուել Մակրոնի «Միասին հանուն հանրապետության» դաշինքը՝ 150-180 մանդատով։ Մարին Լը Պենի «Ազգային միավորում»-ը, որը հաղթել էր առաջին փուլում, այժմ երրորդն է և կարող է ստանալ 120-150 մանդատ։

Այս արդյունքները ցույց են տալիս, որ որևէ քաղաքական ուժ խորհրդարանում բացարձակ մեծամասնություն չի ունենա, և ուժերը ստիպված կլինեն կոալիցիա կազմելու շուրջ բանակցել։ Ամենահավանական սցենարն այն է, որ նախագահ Մակրոնի դաշինքն ու ձախերը կկազմեն կոալիցիա՝ գործադիր իշխանություն ձևավորելու համար։

«Նոր ժողովրդական ճակատ» դաշինքի առաջնորդ Ժան-Լյուկ Մելանշոնը հայտարարեց, որ Մակրոնը պետք է վարչապետ նշանակի ձախակողմյան դաշինքի ներկայացուցչին։ Ընտրություններին մասնակցությունը գերազանցել է 67%-ը։

Ընտրությունների առաջին փուլի արդյունքներով՝ ծայրահեղ աջ «Ազգային միավորում» կուսակցությունը ստացել էր ձայների 33,15 %-ը, ձախ «Նոր ժողովրդական ճակատ» դաշինքը՝ 27,99 %-ը, իսկ «Միասին հանուն հանրապետության» կոալիցիան՝ 20,04 %-ը։

Քաղաքագետ Սուրեն Սուրենյանցի ֆեյսբուքյան գրել է. «Մակրոնը լուծեց իր տակտիկական խնդիրը՝ խուսափեց քաղաքական ֆիասկոյից և «ջարդեց» «աջ ալիքը», որ առաջ էր եկել Եվրոխորհրդարանի ընտրություններից հետո: Սակայն, Մակրոնը չլուծեց հիմնական խնդիրը՝ Ազգային ժողովում թուլացրեց իր քաղաքական հենարանը և պարզապես «կոնսերվացրեց» ճգնաժամը՝ լավագույն դեպքում մինչև 2027-ը կամ մի քանի ամսով, եթե նորընտիր խորհրդարանում քաղաքական կոմպրոմիս չկայանա:

Ձախերի «Նոր ժողովրդական ճակատը», թեև Մելանշոնի լիդերությանը, միաշերտ չէ, հակասություններ կան հենց Մելանշոնի «Անկոտրում Ֆրանսիայի» և սոցիալիստների միջև: Արդյո՞ք Մակրոնը կարող է խաղալ այդ հակասությունների վրա՝ ձևավորելով լոյալ կաբինետ, թե՞ մեկ տարվա տուրբուլենտությունից հետո Ֆրանսիային սպասվում են խորհրդարանական նոր արտահերթ ընտրություններ:

Ամփոփում. Ֆրանսիայի խորհրդարանական արտահերթ ընտրությունները ամրագրեցին գոյություն ունեցող ճգնաժամի ստատուս-քվոն՝ բացահայտելով համակարգային մարտահրավերները՝ հաղթողների փոխարեն»։