Ժամկետային զինծառայության կրճատման որոշումը հապճեպ չէ․ Ս․Պապիկյան

Պայմանագրայինների ավելացման հաշվին կրճատելու ենք ժամկետային զինծառայությունը։

Վերջին երկու օրերի ընթացքում հանրային տարբեր հարթակներում կամ հանրային տարբեր գործիչների կողմից տարբեր տիպի քննադատություններ են հնչել: Այդ մասին ԱԺ-Կառավարություն հարցուպատասխանի ժամանակ ասաց պաշտպանության նախարար Սուրեն Պապիկյանը՝ պատասխանելով ՔՊ խմբակցության պատգամավոր Լիլիթ Մինասյանի՝ ժամկետային զինծառայության ժամկետը կրճատելու մասին որոշման հետ կապված ընդդիմության քննադատության վերաբերյալ հարցին:

<<Նշեմ, որ այս միտքը նոր միտք չէ. նախ խորհուրդ կտամ այն գործընկերներին, ովքեր մեզ մեղադրում են հապճեպ որոշումներ ընդունելու և նախընտրական ինչ-որ գործողություններ կատարելու մեջ, կարդան Կառավարության ծրագիրը: Կառավարության ծրագրով մենք ստանձնել ենք պարտավորություն, որ մեր գործունեության հնգամյա հատվածում պայմանագրայինների ավելացման հաշվին կրճատելու ենք ժամկետային զինծառայությունը: Դա սևով սպիտակի վրա գրված է. կարելի է հիմա կարդալ: 

Երկրորդ փաստաթուղթը՝ ՀՀ բանակի կերպափոխման հայեցակարգ: Այնտեղ նույնպես նմանատիպ հանձնառություն ենք ստանձնել: Կարծում եմ՝ սրանով ամեն ինչ ասված է, թե ինչպիսի երկարաժամկետ պլանավորման արդյունք է սա: Եվ, իհարկե, ամեն ինչ կախված պետք է լիներ, թե մեզ հաջողվո՞ւմ է այս տարիների ընթացքում պայմանագրայինների թվաքանակն ավելացնել: ԱԺ-ն շուրջ երկուսուկես տարի առաջ ընդունել է մի օրենք, որով թույլատրում է ժամկետային զինծառայողներին 6 ամիս ծառայելուց հետո կնքել պայմանագիր: Խոսքը վերաբերում է նրան, որ այսօր «Պաշտպան հայրենյաց» ծրագրով բազմաթիվ զինվորներ երկարաժամկետ իրենց կյանքը կապում են բանակի հետ: Այդ թիվը հասնում է մի քանի հազարի արդեն, այսինքն՝ խոսել, որ մենք կրճատում ենք բանակը, մեղմ ասած, անհեթեթություն է>>,- նշեց Պապիկյանը:

Հիշեցնենք՝ Հայաստանի պաշտպանության նախարարությունը հանրային քննարկման էր ներկայացրել օրենքի նախագիծ, որով առաջարկվում էր պարտադիր զինվորական ծառայության ժամկետը կրճատել 6 ամսով և սահմանել 18 ամիս։ 

Օրենքի նախագծով նախատեսվում է պարտադիր զինվորական ծառայության ժամկետը սահմանել 18 ամիս՝ սկսած 2026 թվականի ամառային զորակոչից: 

ՀՀ վարչապետ Նիկոլ Փաշինյանը հայտնել էր, որ զինծառայության ժամկետը կրճատվում է հունվարի 1-ից: