Հոկտեմբերի 22-ի բիզնես լուրերը

Տեղական

Տաքսու վարորդների մինչև 2019թ․ կուտակված տուրքերն ու տույժերը կհամաներվեն
Մինչև 2019-ի հունիսի 29-ը կուտակված շուրջ 1,3 մլրդ դրամ պարտավորությունները կհանվեն հաշվից։ Դրանք վերաբերում են ավելի քան 5000 վարորդների, որոնց նկատմամբ նախկին հարկային նորմերը այլևս ուժի մեջ չեն։

2025-ի օգոստոսի դրությամբ փողի բազան կազմել է 2.03 տրիլիոն դրամ
Տարեկան կտրվածքով աճը կազմել է 14%։ ԿԲ-ից դուրս գտնվող կանխիկ դրամի ծավալը աճել է 13.6%-ով, իսկ դրամային թղթակցային հաշիվները՝ 34.6%-ով։

ԱԺ փոխնախագահը՝ Ադրբեջանի տարածքով ցորենի ներկրման մասին
Ռուբեն Ռուբինյանը հայտարարել է, որ Ադրբեջանի տարածքով Հայաստան ցորեն ներկրումը իրական դիվերսիֆիկացիա է մատակարարման աղբյուրների ոլորտում՝ կարևորելով դրա ռազմավարական նշանակությունը։

Հայաստանում նախատեսվում է ներդնել խաղային գործունեության վերահսկողության նոր համակարգ
ՊԵԿ-ը բաց մրցույթ է հայտարարել օպերատորի ընտրության համար։ Նոր համակարգը կբարձրացնի ոլորտի թափանցիկությունը և կներգրավի ռիսկերի կառավարման ժամանակակից մեխանիզմներ։

Վարշավայում կանցկացվի Հայաստան–Լեհաստան գործարար համաժողով
Համաժողովը տեղի կունենա նոյեմբերի 18–19-ը՝ ընդգրկելով հաղորդակցությունների, լոգիստիկայի, սննդի, էներգետիկայի և ՏՏ ոլորտների քննարկումներ։

Միջազգային

ԵՄ-ն Եգիպտոսին կհատկացնի 75 մլն եվրո սոցիալ–տնտեսական աջակցության համար
Գումարը կուղղվի կրթության, առողջապահության և կանանց ու երիտասարդների տնտեսական ակտիվացման ծրագրերին։ Այն մաս է կազմում ԵՄ-ի 7.4 միլիարդ եվրոյի մակրոֆինանսական նախաձեռնության։

Իրանը հրապարակել է մանրամասներ Ռեշտ–Աստարա երկաթուղու կառուցման մասին
Նախագիծը իրականացվում է Ռուսաստանի և Ադրբեջանի մասնակցությամբ։ Իրանը նախատեսում է մինչև տարեվերջ ավարտել հողատարածքների ձեռքբերումը, իսկ շինարարական աշխատանքներն արդեն մեկնարկել են։

Ամերիկյան խոշոր բանկերը բանակցում են Արգենտինային 20 միլիարդ դոլար վարկ տրամադրելու մասին
Ծրագիրը համարվում է Դոնալդ Թրամփի վարչակազմի նախաձեռնության մաս՝ աջակցելու Արգենտինայի կառավարության տնտեսական վերականգնմանը։

Nvidia-ն և գործընկերները նախատեսում են 500 միլիարդ դոլարի ներդրում ԱԲ զարգացման համար
Ներդրումները կիրականացվեն ԱՄՆ-ում առաջիկա 3–4 տարիների ընթացքում։ Nvidia-ն արդեն սկսել է արտադրությունը՝ Թայվանի հետ համատեղ Արիզոնայում նորարարական չիպերի թողարկմամբ։