Գերմանիայի Քաղաքացիական պաշտպանության և աղետներից տուժածների օգնության դաշնային գրասենյակի (BBK) ղեկավար Ռալֆ Թիսլերը կանխատեսում է այս ձմռանը էլեկտրաէներգիայի կարճաժամկետ անջատումներ։ Այս մասին հայտնում է Welt am Sonntag հրատարակությունը։
«Հիմքեր կան ենթադրելու, որ ձմռանը հոսանքազրկումներ կլինեն։ Դրանով ես նկատի ունեմ տարածաշրջանային և ժամանակով սահմանափակ էլեկտրաէներգիայի անջատումը», — բացատրեց Թիսլերը:Ինչպես ավելացրել է գերմանացի քաղծառայողը, էլեկտրաէներգիայի խափանումները կապված կլինեն էներգառեսուրսների բացակայության և «օպերատորների կողմից ցանցերի նպատակային պարբերական անջատման» հետ։ Վերջինս կիրականացվի ցանցերի շահագործման մեջ սպառնալիքները կանխելու նպատակով։
Թիսլերը նաև ուշադրություն է հրավիրել այն փաստի վրա, որ գերմանացիները պետք է սպասեն միայն «կարճաժամկետ», այլ ոչ թե «երկարաժամկետ և լայնածավալ» հոսանքազրկումների։ Նա պարզաբանեց, որ ռեսուրսների լուրջ խափանումների դեպքում տանը «մի քանի տուփ և պահածո» է պահում։ Ավելի վաղ Գերմանիան համաձայնեցրել էր քաղաքացիների համար գազի և էլեկտրաէներգիայի գնի սահմանափակման միջոցները։
