Օգտակար գրքեր՝ կառավարման հմտությունները զարգացնելու համար․ IDram-ի փոքր նվերը N զորամասին

Գիրք նվիրելու օրը Հայաստանում սիրված ու տարածված տոն է, իսկ վերջին տարիներին շատերը նույնիսկ անհամբերությամբ են սպասում այս օրվան։ Սա գերազանց առիթ է գրքասեր ընկերներին ուրախացնելու՝ նվիրելով գրքեր, որոնք հատուկ իմաստ ու նշանակություն կունենան հենց նրանց համար։ Գիրքը լավագույն նվերն է, շատերը կհաստատեն։ Ինչու՞․ որովհետև նվիրելով գիրք՝ նվերի հասցեատիրոջը փոխանցում ես մի յուրահատուկ ուղերձ, որ թաքնված է գրքի իմաստի մեջ, հաճախ էլ մտածում, որ գրքից ստացված գիտելիքը հաստատ կօգնի կյանքում և աշխատանքային գործունեության մեջ։

Հենց սա էր Իդրամի աշխատակիցների մտքին, երբ որոշեցին հատուկ ընտրված գրքեր նվիրել ՀՀ ՊՆ N զորամասի սպայակազմին։ Մի քանի տասնյակ գիրք կառավարման հմտությունների զարգացման, աշխատանքում կատարելագործվելու մասին, որոնք պարունակում են ճիշտ ու օգտակար խորհուրդներ բոլոր նրանց համար, ում վրա դրված է կառավարելու բարդ պատասխանատվությունը։

Իդրամի հասարակայնության հետ կապերի ստորաբաժանման ղեկավար Տաթևիկ Վարդևանյանի խոսքով՝ միայն ընկերություններում ու գրասենյակներում չէ, որ մենեջմենթը մեծ տեղ է զբաղեցնում։ «Զորամասի սպայակազմը ևս «թիմ է ղեկավարում», ուստի մտածեցինք, որ թեմատիկ գրքեր նվիրելով՝ կկարողանանք զարգացնել նրանց կառավարման հմտությունները, բարձրացնել նախաձեռնողականությունն ու կատարելագործել գիտելիքները մարդկային մեծ խմբերի հետ աշխատելու գործում», - ասում է Տաթևիկ Վարդևանյանը։