Nestlé-ի բաժնետոմսերը հասել են ութ տարվա նվազագույնի՝ մանկական կաթնախառնուրդների սկանդալի ֆոնին

Ավելի վաղ Nestlé-ն հայտարարել էր 25 երկրներում մանկական կաթնախառնուրդների մի շարք խմբաքանակների հետկանչման մասին։

Շվեյցարական Nestlé ընկերության բաժնետոմսերը անկում են ապրել մինչև վերջին ութ տարվա ամենացածր մակարդակ։ Այս մասին հաղորդում է Bloomberg-ը՝ նշելով, որ պատճառը մանկական կաթնախառնուրդների մի շարք խմբաքանակների աղտոտման հետ կապված սկանդալն է։

Գործակալության տվյալներով՝ Nestlé-ի բաժնետոմսերը 2022 թվականի գագաթնակետից իջել են 38%-ով։ Միևնույն ժամանակ, ընկերության հիմնական մրցակիցների՝ Danone-ի և Unilever-ի բաժնետոմսերը նույն ժամանակահատվածում աճել են համապատասխանաբար 32%-ով և 28%-ով։

Bloomberg-ը նշում է, որ սկանդալը խորացրել է ընկերության վաճառքի շարունակական անկումը և արտադրական ծախսերի աճը։ Բացասական ցուցանիշներ են գրանցել նաև Putina, Nespresso և KitKat ապրանքանիշերի արտադրանքները։

Ավելի վաղ Nestlé-ն հայտարարել էր 25 երկրներում մանկական կաթնախառնուրդների մի շարք խմբաքանակների հետկանչման մասին։ Խոսքը վերաբերում է SMA, BEBA և NAN ապրանքանիշերին, որոնցում հնարավոր է վնասակար մանրէների և սրտխառնոց ու փսխում առաջացնող տոքսինի առկայություն։

Միևնույն ժամանակ, ընկերությունը հայտարարել է, որ մինչ օրս հետկանչված արտադրանքներից որևէ մեկի հետ կապված վարակի կամ ախտանիշների հաստատված դեպքեր չեն գրանցվել։