Հայաստանի Կենտրոնական բանկը միացել է Համաշխարհային բանկի Պահուստների կառավարման եւ խորհրդատվական գործընկերության ծրագրին (ՊԿԽԳ):
Կենտրոնական բանկն անդամակցել է ՊԿԽԳ-ին 2006-2014 թթ., որի ընթացքում բազմաթիվ բարեփոխումներ են իրականացվել միջազգային պահուստների կառավարման գործընթացներում:
ԿԲ-ից հայտնում են, որ ՊԿԽԳ-ի հետ նորացված անդամակցության շրջանակում փորձագիտական աջակցություն կտրամադրվի պահուստների կառավարման գործառնությունները բարելավելու եւ ԿԲ-ի նոր անձնակազմի վերապատրաստման համար:
«Մենք ուրախ ենք ողջունելու Կենտրոնական բանկի «վերադարձը» ՊԿԽԳ: Մեզ համար պատիվ է վայելել նրանց վստահությունը եւ մասնակցությունը Գործընկերության ծրագրին»,- ասել է Համաշխարհային բանկի փոխնախագահ եւ գանձապետ Խորխե Ֆամիլիարը:
«Մենք ուրախ ենք, որ կրկին միանում ենք ՊԿԽԳ-ն-ին, քանի որ Գործընկերության հետ մեր նախկին փորձը հաջողված պատմություն էր: Համաշխարհային բանկի հետ մեր համագործակցությունը դիտարկում ենք որպես համաշխարհային մակարդակով հանրային ակտիվների կառավարման գերազանցության տանող հստակ ուղի»,- հայտարարել է Կենտրոնական բանկի նախագահ Մարտին Գալստյանը:
