Գերմանիան կերկարաձգի սահմանային վերահսկողությունը մինչև սեպտեմբերի 15-ը

Նոր կարգավորման համաձայն՝ այն անձինք, ովքեր արդեն ապաստանի դիմում են ներկայացրել Եվրամիության այլ երկրներում, սահմանին հետ են ուղարկվում։

Գերմանիայի իշխանությունները մտադիր են հարևան երկրների հետ սահմանների վերահսկողությունը երկարաձգել մինչև սեպտեմբերի 15-ը։ Այս մասին հայտնում է Bild պարբերականը։

Պարբերականի տեղեկություններով՝ համապատասխան ծանուցումը մոտ ժամանակներս կուղարկվի Եվրոպական հանձնաժողովին։

Գերմանիայի ներքին գործերի նախարար Ալեքսանդեր Դոբրինդտը նշել է, որ սահմանային վերահսկողության երկարաձգումը երկրի միգրացիոն քաղաքականության վերակազմակերպման կարևոր տարրերից է։

«Մենք երկարաձգում ենք սահմաններին վերահսկողությունը մեր հարևան երկրների հետ։ Սահմանային վերահսկողությունը Գերմանիայում միգրացիոն քաղաքականության վերակազմակերպման տարրն է», — ասել է Դոբրինդտը Bild-ին։

Հիշեցնենք, որ 2025 թվականի մայիսի 7-ին Գերմանիայի ներքին գործերի նախարարությունը չեղյալ էր հայտարարել նախորդ կառավարության՝ 2015 թվականին ընդունված որոշումը, որը թույլ էր տալիս ապաստան հայցողներին մուտք գործել երկիր։

Նոր կարգավորման համաձայն՝ այն անձինք, ովքեր արդեն ապաստանի դիմում են ներկայացրել Եվրամիության այլ երկրներում, սահմանին հետ են ուղարկվում։