Հայաստանի բարձր վարձատրվող ոլորտների ցուցանիշները՝ 2024 թվականի հունիսի դրությամբ

2024 թվականի հունիսին Հայաստանում միջին ամսական աշխատավարձը կազմել է 275,654 դրամ, ինչը 3%-ով ավել է նախորդ տարվա նույն ժամանակահատվածի համեմատ։ Այս տվյալները ներկայացված են ՀՀ էկոնոմիկայի նախարարության կողմից հրապարակված «Հայաստան. տնտեսական հեռանկարներ» 2024 թվականի օգոստոսի 30-ի հաշվետվությունում։

Հետազոտության արդյունքներով, պետական հատվածում միջին աշխատավարձը կազմել է 215,521 դրամ, ինչը 5,7%-ով ավել է նախորդ տարվա համեմատ, իսկ մասնավոր հատվածում այն կազմել է 299,395 դրամ՝ աճելով 2,1%-ով։

Համաձայն զեկույցի, ամենաբարձր վարձատրվող ոլորտներն են՝

• Տեղեկատվություն և կապ՝ միջին աշխատավարձը 824,100 դրամ,
• Հանքարդյունաբերություն՝ 799,925 դրամ,
• Ֆինանսական և ապահովագրական գործունեություն՝ 683,061 դրամ։

Նշվում է, որ 2023 թվականի հունիսի համեմատ աշխատավարձերի աճ գրանցվել է գրեթե բոլոր ոլորտներում, բացառությամբ «հանքարդյունաբերության» և «պետական կառավարում և պաշտպանության» ոլորտների։

Ամենամեծ աճը արձանագրվել է հետևյալ ոլորտներում.

• Գյուղատնտեսություն, անտառային տնտեսություն և ձկնորսություն՝ 15,3%,
• Ֆինանսական և ապահովագրական գործունեություն՝ 12,8%,
• Էլեկտրաէներգիայի, գազի և գոլորշու մատակարարում՝ 10,7%։

(1 ԱՄՆ դոլարի փոխարժեքը կազմել է 387,64 դրամ)։