ՍԴ դատավորները կստանան հավելավճար՝ ստաժի հիման վրա

Հավելավճարի հաշվարկման համար հաշվի կառնվեն նաև օրենքի ուժի մեջ մտնելու պահին արդեն կուտակված աշխատանքային տարիները։

Սահմանադրական դատարանի դատավորների վարձատրության համակարգում փոփոխություններ են առաջարկվում՝ նախատեսելով հավելավճարներ աշխատանքային ստաժի հիման վրա։

Արդարադատության նախարար Սրբուհի Գալյանի ներկայացմամբ՝ գործող համակարգը լիարժեք չի արտացոլում ՍԴ դատավորների բարձր կարգավիճակն ու պատասխանատվության մակարդակը։

Նախագծով առաջարկվում է ՍԴ նախագահի, փոխնախագահի և դատավորների համար սահմանել հավելավճար՝ դատավորի պաշտոնում ունեցած ստաժի համար։

Հաշվի առնելով ՍԴ դատավորների 12-ամյա պաշտոնավարման ժամկետը՝ հավելավճարը կգործի առավելագույնը 11 տարվա համար և կկիրառվի աճողական սկզբունքով՝ սկսած պաշտոնավարման երկրորդ տարվանից։

Մասնավորապես՝

  • 2-րդ տարում՝ 20%
  • 3-րդ տարում՝ 35%
  • 4-րդ տարվանից՝ յուրաքանչյուր տարի նախորդից 10%-ով ավելի

Հավելավճարի հաշվարկման համար հաշվի կառնվեն նաև օրենքի ուժի մեջ մտնելու պահին արդեն կուտակված աշխատանքային տարիները։

Նախարարի գնահատմամբ՝ 2026 թվականին այս փոփոխությունների արդյունքում ՍԴ նախագահի, փոխնախագահների և 7 դատավորների համար նախատեսվում է շուրջ 46.8 միլիոն դրամ լրացուցիչ ծախս։