2024թ-ի մայիսի վերջի դրությամբ ՀՀ առևտրային բանկերի և վարկային կազմակերպությունների կողմից տրամադրված լիզինգի ծավալը կազմել է շուրջ 187 միլիարդ դրամ՝ 2.8 անգամ ավել, քան 2022թ-ի հունվարի վերջի դրությամբ։ Այս մասին տեղեկանում ենք Modex խորհրդատվական ընկերությունից։
Լիզինգի ծավալները սկսել են կտրուկ աճել 2023թ-ի մայիսից, երբ կառավարությունը փոփոխություններ է իրականացրել 2020թ-ին ներդրված արտադրողականության խթանման ծրագրում՝ ընդլայնելով շահառուների շրջանակը։
Նշենք, որ այս ծրագրի շրջանակներում տնտեսվարողներին տրամադրված լիզինգի տոկոսադրույքների սուբսիդավորման համար 2023-ին կառավարությունը ծախսել է 1.8 անգամ ավելի շատ գումար, քան 2022-ին, իսկ 2024-ին նախատեսվում է նախորդ տարվա համեմատ կրկնապատկել աջակցության մեծությունը։
2024թ-ի հունվարին ծրագրում կրկին կատարվել են լրացումներ՝ ընդլայնելով լիզինգի օգտագործման նպատակների շարքը։ Հաշվի առնելով այս փոփոխությունները, ինչպես նաև ծրագրի վերջնաժամկետը (2024 տարեվերջ)՝ կարելի է ակնկալել, որ լիզինգի ծավալների աճը կշարունակվի։
Լիզինգի վերաբերյալ մեր նախորդ հրապարակումը հեռացվել է, քանի որ այն ներկայացնում էր միայն առևտրային բանկերի կողմից տրամադրված լիզինգի ծավալները, այնինչ այս գծապատկերը ներառում է նաև վարկային կազմակերպությունների կողմից տրամադրված լիզինգը և ավելի համապարփակ պատկերացում է տալիս շուկայի վերաբերյալ։
